Tahimik na naglalakad pauwi si Hermonia Melendez, isang simpleng graduating high school student mula sa isang kilalang unibersidad. Sa bawat hakbang, tanging lamig ng hangin at mga kislap ng poste ang kaniyang kasama. Ngunit ang katahimikan ng gabi ay biglang nabasag nang sumulpot sa harapan niya ang tatlong nilalang-mga mukhang tao, ngunit halata sa kanilang anyo na hindi sila ordinaryo. Mapuputi ang balat na tila walang dugong dumadaloy, nanlilisik ang mga pulang mata, at kumikislap sa ilalim ng ilaw ang mahahabang pangil at matutulis na kuko. Hindi maipagkakaila ang kanilang kaakit-akit na anyo, ngunit higit na nangingibabaw ang panginginig ng takot na gumapang sa kaniyang katawan.
Samantala, si Aelus ay abala sa kaniyang tungkulin nang gabing iyon. Palipat-lipat siya ng lugar, lundag dito at lundag doon, hanggang sa marinig niya ang isang malakas na sigaw. Agad siyang nagtungo sa pinagmulan at nadatnan ang isang dalaga-kasama ang kaniyang mga kalaban, ang mga Haxon. Nag-init ang kaniyang dugo nang makita ang takot sa mga mata ng babae. Walang pag-aatubili, nilapitan niya ito at napansin ang mga luha sa pisngi ng dalaga. Niyakap niya ito upang bigyang-lakas, at laking gulat niya nang biglang tumugon ang babae sa kaniyang yakap. Sa sandaling iyon, napako na lang siya sa kinatatayuan, hindi makapaniwala sa hindi inaasahang damdamin na bumalot sa kaniyang buong kalamnan.
aliyses original story
all rights reserved.
Todos los derechos reservados