Koi Sath Hu

وہ بھاگ رہی تھی ۔۔ تیزی سے ۔۔ ہر درد کی پرواہ کئے بغیر ۔۔۔ آنسوؤں کو بہاتے ہوئے ۔۔
قدموں کی آوازیں اسے اپنی پشت سے محسوس ہورہی تھیں ۔۔
'' پکڑوں اسے ۔۔ جلدی '' کسی کی آواز اسکے کانوں تک پہنچی تھی ۔۔ اس نے اب اپنی رفتار تیز کی ۔۔
اسے نہیں معلوم تھا کہ وہ کہاں جارہی ہے ۔۔؟ وہ خالی سڑک تھی ۔۔ جس کے دونوں اطراف میں درخت تھے ۔۔
قدموں کی آواز اب بھی تیز ہورہی تھی۔۔۔ اور پھر ۔۔ اچانک ۔۔ فضا میں ایک آواز گونجی تھی ۔۔
اسے محسوس ہوا ۔۔ کوئی چیز بہت تیزی سے اسکے بازوں میں آکر دھنسی تھی ۔۔
اسے محسوس ہوا ۔۔ تیزی سے خون اسکے بازوں سے بہنا شروع ہوا ۔۔ اپنے دوسرے ہاتھ سے اس نے اپنے بازوں کو پکڑ کر دبایا تھا ۔۔ درد کی لہر اس کے پورے وجود میں دوڑ رہی تھی ۔۔۔ مگر وہ رک نہیں سکتی تھی ۔۔ اسے بھاگنا تھا ۔۔۔ اور وہ اب بھی بھاگ رہی تھی ۔۔۔ اسکی نظروں کے سامنے اندھیرا تھا۔۔ اور وہ ان اندھیروں میں گم ہوجانا چاہتی تھی ۔۔۔
اچانک ہی ایک اور آواز گونجی تھی ۔۔۔ اور اس بار ۔ گولی اس کے ٹانگ میں آکر لگی تھی ۔۔ وہ فوراً لڑکھڑائی ۔۔۔ اس کے لئے خود کو سنبھالنا ناممکن ہوگیا تھا ۔۔
اور پھر اس نے محسوس کیا ۔۔
وہ دائیں جانب گری رہی ہے ۔۔ مگر وہ گری نہیں تھی۔۔
وہ ایک کھائی تھی ۔۔۔
اور اس نے خود کو اس کھائی میں گرتے محسوس کیا تھا ۔ْ۔۔