2 parts Complete في أحد الليالي في مربوعة حوش عمنا عاشور مقعمزين معاذ وحسام خوت ومقربين من بعض ..معاذ يتصفح ع النت لفت نظره منشور ع كتاب وكان يحب يقرا كل شيء اي شيء ويحب الحاجات الغريبة وماوراء الطبيعة ..كان الكتاب يتحدث عن الجن وفيه طلاسم وتعاويذ استحضار .وحسام كان من أكبر الجبناء والخوافين من هالمواضيع لذا حب يخوفه فلفله معاذ شاشة اللاب توب و قاله بخبث
_ شن رأيك .كانت صورة لشياطين وطلاسم وكتابة عربية غير مفهومة .
حسام _ أعوذ بالله منك ومن الشيطان الرجيم اقعد دور عليهم لين تجي ع راسك .
معاد_ لا كان بيجو راهو جوك ماسمعتش الكل يقولو ااي يخاف من حاجة تجيه ..وإلي يخاف من البعبع يطلعله .
حسام _ ارقد خيرلك .وشن هذا تخربيش راهو واضح مفبركة تي كتيبة عربي شن مكتوب قعد يتهجأ فيها ويحرك في إيده ع الرسمه بلا مايحس ع روحه لان عقله هكي قاله .
ومجرد ما كمل قعد معاذ يضحك عليه قاله
_ حي عليك خاف حق تو يجوك نادتهم أنت .
حسام وكانت في فمه ضحكة خبث _انت الي مفروض تخاف تو جوني جماعتي ونوصيهن عليك نردلك شوية من الي ادير فيه .
معاذ والخوف بدي يلعب في قلبه_ تي فكنا منها بصارتك وارقد .وهوا يشوف لحسام الي كان كأنه إنقلب لأن حسام كان هادئ من يومه ودليل ماعمره يقيم في حد عين زي ما توا قاعد مخلي عيونه في عيونه كأنه يتحداه ....
