Lahat ng bagay may pinagmulan. Lahat may simula. Subalit, kailan mo malalaman kung nagsisimula ka na ba? Sa umaga, simula na bang maituturing kapag nagmulat ka ng iyong mga mata? O magsisimula pa lang kapag bumangon ka na mula sa pagkakahiga mo sa iyong kama? Kapag ba nakipagkilala ka sa isang tao, yun na ba ang hudyat ng simula ng pakikipagkaibigan? O kapag handang tumulong sa isa't isa, saka pa lamang kayo magiging magkaibigan? Kapag ba naging crush mo ang isang tao, simula na ba yun para siya ay mahalin mo? Paano mo naman malalaman kung mahal mo na siya? Sabi nila, ang pagsisimula ang pinakamahirap sa lahat. Kapag daw kasi nakapagsimula ka na, madali na lamang ang mga kasunod. Paano kung 'di mo namalayan na nakapagsimula ka na pala? Magugulat ka na lang, tapos na. Wala na. Hindi mo man lang maiisip na pahalagahan ang iyong mga karanasan kung sakali mang ito ay magwawakas na nga. Paano ba magsimula?