ANG WALANG HANGGANG PAALAM
"O pagibig na makapangyarihan... pag ikaw ay nasok sa puso ninuman hahamakin ang lahat masunod ka lamang..."Katagang madalas nating maririnig sa matatanda tuwing tayo’y lumulundag sa usapang pag-ibig. Bakit nga ba nasabing makapangyarihan ang pag-ibig? Siguro gaya ngayon, hindi ko alam kung anong pumasok sa kukote ko’t naisipan ko itong isulat. Ang totoo eh, ngayon lang ako magsusulat tungkol sa pag-ibig. Marahil sa kaduwagan na rin na masabihan akong baduy at malambot bilang isang lalake. Alam naman nating lahat na ang mga lalake ay hindi dapat kailanman madidikit sa mga bagay at usapin na nagpapakita ng kahinaan. Mga bagay na gaya ng bulaklak, hugis puso, kulay na pink, shitzu, at mga stuffed toys lalo na ang Hello Kitty. Allergic kami dun noh! Kung sa bagay may mga kilala din akong mga astig pero nanonood ng mga koreanovela at umiyak nung mamatay si Bruce Willis sa pelikulang Armageddon. Pero meron nga kayang taong walang emosyon? Yung tipong hindi marunong magmahal at hindi rin marunong magalit? Kung papansinin ang katotohanan marami naman talagang tumatandang dalaga’tbinata. Pero hindi rin naman siguro sa kadahilanang hindi sila marunong magmahal.
