18 أجزاء مستمرّة في كل حوش حكاية، وفي كل قلب وجع ما قالهش...
وفي زاوية من الدنيا، بين مدينتين وتعب عامر في الوجوه، بدت قصتنا... مش قصة حب وبس،
قصة ناس عاشوا وصبروا،
ناس كل ما تعثروا، قاموا،
وكل ما خابت فيهم الحياة، ردّوا عليها بالضحكة والصبر.
ما كانش عندنا لا بيوت فخمة، ولا أمان دايم...
لكن كانت عندنا قلوب، مليانة دفى،
وكان عندنا صبّوة... حنين ما فارقناش،
وشوق للأيام النقية،
وحُب... ما قدرش الزمن يكسّره.
أنا رُبــى، نكتبلكم من بعيد، من مكان ما تشرقش فيه الشمس بنفس الشكل،
لكن كل ما نغلق عيوني، نسمع صوت امي وضحكات بوي،
ونشوف تواب وسارة يضحكوا قدامي،
ونحس قلبي يرجع يطق ف حضن أهلي.
الرواية هذي مش عني وبس !!
هي عن قلوب واجهت الحياة وراها باب مسكر، لكن صدقها فتح أبواب ما كانتش ف الحسبان.
هي عن تواب، اللي بين الكتب خبّت حبّها،
وعن سارة، اللي ظنت الحب من طرف واحد، لكن قلبها ما كذبهاش،
وعن جلال، اللي حنّ لبنية حتى الحنين تعب منه،
وعن ناس، كانوا زيي وزيك... بس صدقهم خلّى الحكاية تستاهل تنحكى.
لو كنت تقرأ، وعيونك فيها حنين...
فـ تعال، خُش علينا، وقعد بيننا.
واحكي معانا "الصبّوة"... يمكن تلقى فيها روحك.
رواية : الصبّوة
الكاتبة : Nonalsebhawy
