Ang Mahiwagang Mundo ni Sebastian

Mag-isa sa buhay at hindi na nakilala ng labingwalong taong gulang na si SEBASTIAN o Baste ang mga magulang niya. Mula pagkabata ay palipat-lipat na ng foster homes si Baste hanggang sa mag-desisyon siya na tumayo na sa sarili niyang mga paa. Nagtrabaho siya habang nag-aaral bilang scholar.

Maayos naman sana ang buhay niya, kung hindi lang dahil kay AUSTIN at sa mga kaibigan nito na walang alam kundi ang pahirapan ang buhay niya sa school araw-araw. Kung hindi mga panlalait ay pambubugbog naman ang ginagawa ng mga ito sa kanya na nakaapekto sa trabaho at pag-aaral niya na naging dahilan ng pagkasisante niya at pagkawala ng scholarship niya.

Gulong-gulo na ang isip ni Baste hanggang sa maisipan niyang wakasan na ang sariling buhay, ngunit dumating sa buhay niya ang Diyosa na si DALIKMATA, at iniligtas siya. Binuksan nito sa kanya ang mundo ng hiwaga at mahika, at kay Dalikmata rin niya malalaman ang katotohanan tungkol sa kanyang tunay na pagkatao.