One Sweet Night

Tuluyan nang napatigil si Jake sa pagkanta nang makita ang babaeng nakatayo sa harapan niya, at tumigil din ang banda sa pagtugtog. Akala niya isa lang ito sa mga admirer o fans niya. Pinagmasdan niyang mabuti ang lasing na babae na hindi man lang makatayo ng maayos dahil sa kalasingan. Nakasuot siya ng maluwag na itim na sando at maong, mahaba ang buhok, maputi ang balat at simpleng kagandahan. Humakbang pa ito palapit sa kanya bago nagsalita.

"Hoy ikaw! Kilala kita, ang ganyang mukha ay nanloloko ng mga babae!" malakas na sabi ni Nicole.

"What?!" Nagtatakang tanong ni Jake.

"Lagi kayong nagbibigay ng maling pag-asa sa mga babae! Tapos kapag nainlove na sa inyo, iiwanan niyo na! Grabe kayo! Walanghiya kayo!" Galit na sigaw ni Nicole.

"Halika na Nicole!" Sigaw ni Jane, habang sinusubukang hawakan si Nicole sa braso, pero di sumama si Nicole.

"Hindi, tuturuan ko ng leksyon ang jerk na 'to!"

Pagkasabi nito ni Nicole ay bigla niyang hinablot ang leather jacket ng lalaki at inilapit sa mukha niya, napayuko si Jake sa biglang pagkilos ng babae at sa pagkakataong iyon ay naglapat ang kanilang mga labi.