The Neglected Wife

Isang babaeng pinagpala. 'Yan ang tingin kay Chynna ng mga taong nakapaligid sa kanya nang pakasalan niya si Geoff Montecarlo. Para sa kanila, kainggit inggit ang pagkakaroon ng asawang bukod sa mayaman na ay ubod pa ng gwapo. Total package 'ika nga! Madalas na biro tuloy sa kanya, nang magpaulan daw siguro ng pagpapala ang Diyos ay malamang nasalo niya ang lahat ng iyon.

Lingid sa kaalaman ng lahat, hindi na masaya si Chynna sa piling ng asawa. Sa loob kasi ng isa't kalahating taon ng kanilang pagsasama, madalang pa sa patak ng ulan kung siya ay bigyan ng atensyon nito. Dahil doon ay nagsimula siyang magkaroon ng depresyon at insekyuridad.

Sa kanyang pangungulila sa pagmamahal ay natagpuan niya ang kanyang sarili sa loob ng isang gaybar, ang Narcissus. Doon niya nakilala si Bryle. Isa itong macho dancer at siyang naging tagapag aliw niya ng gabing iyon. Sa palagian nilang pagkikita ng lalaki ay unti unti silang nagkahulugan ng loob nito. Sa kanya niya natagpuan ang pagkalinga na siyang ipinagdadamot sa kanya ng asawa. Dahil dito ay naisip niyang iwanan na lang si Geoff at tuluyang sumama kay Bryle.

Ngunit sadya nga talagang mapagbiro ang tadhana. Sa hindi inaasahang pagkakataon, natuklasan niyang magkakilala pala ang dalawa nang makita niyang magkasama ang mga ito. Ano kaya ang ugnayan nila sa isa't isa? At sa kanyang labis na pagtataka, bakit kaya umiiyak na nakaluhod si Geoff sa harapan ni Bryle?