GRACIELA

Ang reinkarnasyon ay isang bagay na sumisimbolo sa muling pagkakatawang-tao ng isang taong matagal nang yumao. Ngunit para sa ibang tao, ito ay isang tadhana na itinakda ng panahon.

Si Graciela Evangelista ay anak ng isang maharlikang pamilya. Nakatakda na siyang ikasal sa anak ng pinakamayaman at maimpluwensiyang angkan sa kanilang bayan. Ngunit lingid sa kaalaman ng kaniyang pamilya ay mayroon siyang lihim na relasyon sa isang bastardo.

Habang papalapit na ang araw ng kasal ay hindi maalis sa isip ni Graciela ang kanilang gagawing pagtakas ng kaniyang nobyo. Nakatakda silang tumakas bago ang araw ng kaniyang kasal.

Ngunit sa hindi inaasahang pagkakataon ay mapapatay si Graciela sa kalagitnaan ng kanilang pagtakas. Bago siya tuluyang malagutan ng hininga ay ipinangako niya sa kaniyang nobyo na siya ay magbabalik upang ipagpatuloy ang kanilang naudlot na pag-iibigan.

At hindi nga siya binigo ng tadhana dahil makalipas ang halos isang siglo mula nang mamatay si Graciela ay isisilang na ang kaniyang reinkarnasyon.

Muling mangyayari ang naganap sa nakaraan. Hindi ito kailangang mabago bagkos ay kailangang maitama ang mga nagawa nilang pagkakamali.

Sa kaparehong araw kung kailan namatay si Graciela muling magtatagpo ang reinkarnasyon ng dalawang magkasintahan na naudlot ang pag-iibigan sa nakaraan.