Magandang Nilalang

MASAKIT para kay Benedict ang pagtaksilan ng mga taong mahal niya. Nalaman niyang may affair ang kanyang nobya at nakatatandang kapatid. Ngunit wala nang mas sasakit pa sa pag-abandona sa kanya ng sarili niyang pamilya dahil sa isang krimen na hindi naman niya ginawa. Kaya umalis siya, nagpakalayo-layo at hindi na nagpakita pa.

Napadpad siya sa kabundukan ng isang malayong probinsya. At doon ay nakilala niya ang dalagang si Liwayway. Pinakamaganda at pinakamabait si Liwayway sa lahat ng nakita at nakilala niya. Mag-isa na lang ito ngayon sa buhay dahil namatay na ang mga magulang nito.

Pareho silang malungkot dahil sa mapait na nangyari sa kanilang mga buhay. At ang kalungkutan nila ang naging daan upang lalo pa silang mapalapit sa isa't-isa, dahilan upang unti-unting matuklasan ni Benedict ang mga bagay na bumabalot sa tunay na pagkatao ni Liwayway.

Babalik pa kaya si Benedict sa pamilyang minsang nagtaboy sa kanya? O mananatili na lamang siya sa piling ng kanyang mahal na si Liwayway?