Padayon, Ningning! (ONGOING)

"Sabi nila, libre lang daw ang mangarap. Pero hindi naman nila nabanggit na may bayad pala ang pagtupad nito. Sundin ko lang daw ang pangarap ko, ngunit hindi naman ako nasabihan na napakaraming balakid pala ang kailangan kong lagpasan bago ko marating ang aking destinasyon. Akala ko, isang daang matuwid lang ang kailangan kong lakbayin. 'Di naman ako nasabihang napakarami pala nitong paliko-liko, nagkalat pa ang malalaking mga bato. Napakalayo rin ng distansya nito mula sa pinanggalingan ko. Kung alam ko lang na ganito pala, sana ay nakapaghanda man lang ako ng maraming gasolina. 'Di bale na nga lang, may gasolinahan naman siguro sa mga madadaanan ko."

Si Shine Villanueva o mas kilala bilang Ningning ay nagsimulang bumuo ng mga pangarap niya sa buhay simula nang siya ay tumungtong sa high school. Buong akala niya ay madali lamang ang mangarap at pagtupad sa mga ito. Hindi niya inakalang kailangan niya munang mabigo, panghinaan ng loob, at makaranas ng maraming pagsubok. Ilang beses siyang nagtangkang sumuko ngunit mayroong humihimok sa kaniyang magpatuloy. Sa paglipas ng panahon, kaniyang napagtanto na darating din ang tamang pagkakataon upang katulad ng kaniyang pangalan ay magningning din siya sa sarili niyang pamamaraan.