Type kita... Mister Sungit!

Ron Rich Pulido. Isang hunk, celebrity-model na nuknukan sa kasupladuhan at kasungitan. Pero walang pakialam si KJ kung ito na ang pinakamasungit at supladong nilalang sa earth. Simula kasi no'ng araw na magkrus ang landas nila, hindi na nawala sa isip niya ang itsura ng binata.

Kaya naman sa bawat pagkakataong makikita niya ito ay nagpapansin siya rito. Dumating na nga sa puntong napagkamalan siyang stalker nito, at ipinadampot sa guwardiya ng village, kung saan ginaganap ang photo shoot ng binata. Mabuti na lang at matalino siya. Mantakin mong naisip niyang ipagsigawan sa lahat na ina siya ng magiging anak nila ni Ron Rich?

"What the hell you are doing?" nanggigigil na tanong nito sa kaniya.

Nginitian niya ito nang ubod nang tamis at buong pagmamalaking sinagot ito, "Congratulations Honey, magiging Daddy ka na!"

Nanlalaki ang mga mata ni Ron habang nakatitig ito sa kaniya. "Baliw kang babae ka! Paano naman ako magiging ama ng anak mo? Ni hindi nga kita kilala, at saka naka-one night stand ba kita?" sumasakit na ang ulo nitong tanong sa kaniya.

"Kaye Janelle Marasigan, KJ for short. Ngayong kilala mo na ako, halika na't magpakarami na tayo!" Umabrisyete pa siya sa lalakeng tila hanggang nang mga sandaling iyon ay natitigilan pa rin.

Umubra kaya ang kasungitan at kasupladuhan ni Ron, sa napakakulit at nuknukan ng ingay na si KJ?