A Woman Of Thorns

"Raphael?" mahinang pagtawag ko sa atensiyon nito.

Marahan siyang tumango at pagkaraan ay umiling. "Your voice is so sweet," pabulong na aniyang halos hindi ko narinig.

Unti-unting tumaas ang sulok ng labi ni Raphael habang nakatitig pa rin sa akin. O baka nakatitig sa labi ko? Nasundan ko ang mga mata niyang pinasadahan ng tingin ang bawat bahagi ng mukha ko. Bumaba ang tingin niya at bumaba iyon sa labi ko. Napatingin na rin ako sa labi niya at umawang iyon ng bahagya.

Napalunok ako nang may maramdamang kung ano sa aking tiyan. Para iwasan ang kung ano pa mang puwede kong maramdaman ay pumasok na agad ako sa kotse. Hindi ko tinapunan ng tingin si Raphael simula nang umikot siya at makaupo.

Diretso lang ang tingin ko sa daan at pinipilit ang sariling huwag siyang lingunin kahit kanina pa siya tumitikhim. Nang huminto kami sa isang traffic light ay nakita ko sa gilid ng aking mga mata ang paglingon niya. Hindi na rin ako nakatiis at nilingon na siya.

"Raphael-"

"I'm attracted to you, Rosella."

Napaawang ang labi ko sa sinabi niya.

Hindi pa man pumapasok sa isip ko ang sinabi niya ay mabilis siyang dumukwang sa akin. Tila naestatwa ako sa kinauupuan nang lumapat ang labi niya sa labi ko.