دروب الإِندِثار

ايدي ترجف واني لازمة القلم بيها عيوني تسيل دموعها بكثافة ، معقولة اكو انسان يوقع ؏ تدمير مستقبلة!! اي اني راح اسويها بس تحت التهديد تحت الامر الواقع علمود شخص..

اجاني صوته التعبان خلاني ارفع راسي واباوعله مقهورة عليه ومقهورة ؏ نفسي وموقفي الحقير..

- لا توقعيين اياج تسوينها

تقدم من وراي حسيت بخطواته وحرارة جسمه الضخم الي خيم عليه واني عيوني ما وڪعن من الانسان الوحيد الي اموت علموده ، مربط ؏ كرسي ووجهة من الدم ما مبين وجسمه كذلك مشطب وينزف..

اجاني صوته ڪ فحيح الافعى من وره وقريب أذني..
- توقيعج مقابل حياته لا تفكرين زايد انتِ الخسارنه بكل الاحوال

عيني ؏ السلاح الي مثبت براسه واباوعله من سمع الكلام تحرك بقوة وصاح..

- تثقين بيه مو؟؟ لا توقعين لاااااا توقعععين ما عليج بييي خلييج وياااي

ما احس غير الي لازم السلاح ضربه بطرفة ؏ راسه وخله الدماية تطافر منا ومنا شهگت وشمرت القلم اريد اطمن عليه وقبل لا اخطي خطوتين نسحبت من ايدي بقوة..

- وين؟؟

- الله يخليك بس اشوفه بسسس اطمن عليه الله يوفقك والله اوقع واوافق بس لا تضربووونه لاااا تضربوونه

- بسرعة ما عندي اليوم كله انتظرج

هد ايدي بسرعة ركضت گعدت ؏ ركباتي گدامه وامسح ؏ وجهة..

- انتَ زين؟!!

رفع عيونه الذبلانه بصعوبة وقطرات من دمه صارت توڪع ؏ ايدي وملابسي