Daipawnah

DAIPAWNAH

'Daipawnah' tih hla hi ka rilru ah hian a awm fo thin a, ka ngaithlak hian min hneh fo thin. Hun tam takah hian Pathian thusawi ai hian fakna hla hian ka rilru a khawih in ka tan chuan awmzia a nei fo zawk thin.

He hla "Daipawnah' tih hi ka ngaihthlak nawn apiangin he hla rilzia leh awmzia a neih thukzia hi ka hriat belh leh thin. A phuahtu hi ka hre lo, mahse hla ropui tak erawh zawng a phuah chiang a ni. Kan Bible ah ngei pawh 'daipawn' tih tawngkam hi Thuthlung Hlui a Numbers leh Leviticus ah kan hmu nual, 'daipawn' hian mi hnuaihnung, mi hmuhsit, mi chhia, phar, hmeichhe thi put, mitthi avanga bawlhhlawh te chu mi zingah cheng tlak lovah ngaiin mi awm lohna hmun, daiah an awmtir thin a ni awm e.Sual thawi nana an hman te pawh daipawnah an halral leh thin a nih awm kha. "Daipawn' hian mi tlawm, mi ropui lo, mi hmuhsit a entir a, hei bakah hian mi kal lohna, mi en kan, hmun hrehawm leh harsa a kawk in ka hre bawk. A ropui lo a ni 'daipawn' chu.

Helamah hian kan peng daih teh ang, keini hian eng chen nge midang tan hian kan inhawn a, engtiang chenin nge kan inpek thin le. Kan nunah hian daipawn thleng lo hian rawng kan bawl thin nge nia mahni inphatin, hrehawm leh harsat huamin kan zui thin zawk. Kan chhehvelah hian rawngbawlna tur, pui ngai, ngaithlak sak ngai hi an va tam em. Biakin leh a chhehvel a heng mite hi vei lo hian mi thlen phak lohna, an awmna hmun daipawnah hian kan daichhuah ve a ngai fo lo maw. Daipawnah, an zingah, an tuarna te ngaithla in I chhuak ve ang u hmiang. Thil ropui tih a ngai lo, kan awmna hmun sawn hret mai chauh a lo ni asin.