After-Work Bliss

Bahay. Trabaho. Trabaho ulit.

Ganyan ang cycle ng buhay ni Czarina Villaluz. Sa edad na dalawampu't lima ay ramdam na nya kung gaano ka-unfair ang buhay para sa mga kagaya nyang breadwinner.

Kumayud man sya nang kumayod ay wala pa ring natitira para sa sarili. Ilang oras man ang igugol nya sa overtime; ilang sideline man ang pasukan nya pagkatapos ng office hours ay palagi pa ring kulang para masuportahan ang pamilya.

Araw-araw ay pagod ang isip at katawan pero hindi sya pwedeng tumigil para magpahinga dahil sya lang ang inaasahan ng dalawa nyang kapatid at mga magulang.

Nakakalunod. Nakakapagod. Nakakawala ng pag-asa.

Provider sya ng pamilya nila pero kailan pa ba sya huling nakabili ng isang pares ng bagong pantalon? Handa syang ibigay ang lahat sa bawat daing ng pamilya. Kahit pa sya ang mawalan, okay lang.

Mabuti na lang, nandyan palagi sa tabi nya si Gavin Castro, ang kasintahan nyang gagawin ang lahat para iparamdam ang hinahon, kalma, pag-asa at saya sa kabila ng bawat problemang kinakaharap nya.

Lahat ay kakayanin nya basta't silang dalawa ang magkasama... kahit gaano pa kabigat ang hamong nakaabang para sa kanila.

Lahat ay kakayanin nya basta't silang dalawa ang magkakampi... kahit gaano pa sila pagkaisahan ng mundo.