ONCE A PROVINCE GIRL

Mahalaga para sa ibang tao kung saan ka lumaki o kung saan ka nabibilang, dahil para sa kanila, iyon lang ang mahalaga.

Dati, naniwala ako na walang tatanggap sa isang tulad kong lumaki sa probinsya sa oras na mapunta ako sa isang malaking mundong pakiramdam ko ay hindi ako nabibilang.

Ako si Cath Bautista, isang simpleng probinsyana na may malaking pangarap-ang maging isang kilalang fashion designer balang araw. Nang mabigyan ako ng scholarship sa isa sa mga prestihiyosong unibersidad sa Maynila, buong tapang kong iniwan ang buhay na nakasanayan ko upang habulin ang mga pangarap na matagal ko nang pinanghahawakan.

Akala ko ang pinakamahirap na laban ay ang makibagay sa mundong hindi ko kinalakihan at patunayan sa iba na may halaga rin ang isang tulad ko.

Ngunit hindi ko inaasahang ang pagdating ko sa lungsod ang magiging simula ng mga katotohanang matagal nang nakatago-mga lihim na tuluyang magbabago sa buhay na alam ko at sa pagkataong akala ko ay kilala ko na.

Pero hindi ako nagpatinag sa mga sinasabi ng iba. Sa tulong ng mga taong naniwala at tumanggap sa akin, natutunan kong lumaban para sa aking mga pangarap at para sa sarili kong lugar sa mundong minsan kong inakalang hindi para sa akin.

Ito ang kuwento ng isang simpleng probinsyana na natutong mangarap nang mas malaki kaysa sa mga limitasyong itinakda ng iba.