THE CHEATER'S WIFE

Walang perpektong pamilya, alam iyon ni Zaida. Away-bati. Tampuhan. Pagtatalo. Normal na tagpo ang mga iyon sa tahanan ng sinumang mag-asawa. Wala silang ipinagkaiba ni Gavin pero kampante siya sa pagmamahal na ibinibigay nito. Naniniwala siyang sa kabila ng kawalan nila ng anak ay sa kaniya pa rin ito laging umuuwi. Siya pa rin ang nagmamay-ari ng mga salitang hangad na marinig ng karamihan sa mga babaeng nangangarap ng matinong kabiyak.

Pero ang lahat ng bagay ay kumukupas nga ba pati ang pagmamahal?

Sa araw ng kanilang wedding anniversary ay ginimbal siya ng kataksilan ng asawa. Gusto sana niyang bigyan pa ito ng pagkakataong ipaliwanag ang sarili pero ginulat siya nito sa annulment paper na nilapag para pirmahan niya.

Bumagsak ang kaniyang mundo at sa sobrang desperasyon ay naisip niyang magpakamatay. Pero sa halip na magawa ang gusto ay natagpuan niya ang sariling pinipigilan ang lalaking nakasampa sa railing ng tulay at gusto ring tumalon tulad niya.