Boy in Disguise

Si Mikael "Kael" Navarro ay may halos lahat ng bagay na pinapangarap lang ng karamihan, gwapo, mayaman, charismatic, at namumuhay na parang bida sa isang pelikula. Pero sa likod ng palaging kumpiyansang ngiti at tila perpektong buhay, may isang binatang halos buong buhay ay nanatiling nakakulong sa komportable at protektadong mundo ng kanilang pamilya.

Sa unang pagkakataon, gumawa si Kael ng desisyong tuluyang magbabago sa buhay niya.

Nag-enroll siya sa Stonevale University (SU) dahil sa iisang tao.

Athena Ramirez.

Isang matalino, mabait, at kahanga-hangang estudyante na agad nakakuha ng atensyon niya sa unang pagkikita pa lang.

Habang mas nakikilala niya si Athena, unti-unti niyang napagtanto na halos lahat ng gusto at kinahihiligan nito ay malayo sa mundong kinalakihan niya. Kaya sa desperadong hangaring mapalapit sa kanya, gumawa si Kael ng isang padalus-dalos na desisyon-

Hinayaan niyang isipin ng lahat na bakla siya.

Ang simpleng pagpapanggap ay mabilis na naging simula ng isang magulong college life na puno ng mga hindi pagkakaintindihan, nakakahiya ngunit nakakatawang sitwasyon, at mga problemang hindi niya inaasahang haharapin.

Habang pilit niyang pinapanatili ang pekeng pagkataong ginawa niya, kailangan din niyang tiisin ang walang tigil na bangayan nila ng varsity player na si Ashton Alvarez, makisabay sa magulong mundo ng student politics, at itago ang tunay niyang nararamdaman para kay Athena.

Kasama ang mga matatalik niyang kaibigan na sina Renan, Pillow, at Kisso, haharapin ni Kael ang samu't saring pagsubok tungkol sa pagkakaibigan, kompetisyon, unang pag-ibig, at mga lihim sa isang unibersidad kung saan walang sikreto ang nananatiling nakatago habambuhay.

Sa mundong puno ng maling akala at mga pagpapanggap, hanggang kailan kayang panindigan ni Kael ang kasinungalingang siya mismo ang gumawa... bago tuluyang ibunyag ng puso niya ang katotohanan?