باب مقفل

شكد حارة دخيلك ربي مانوي البرد يجي؟ كتلني العطش خلي اشرب مي " وكفت ونزلت جنطتي بالكاع وطلعت بطل المي من جوا الملازم كرمزت ارتاح شوية من المشي وهم اشرب المي انتبهت سيارة سودة وكفت يمي التفتت الها نزل جام السيارة السايق والي بصفة ملثمين دب الخوف بكلبي انفتحن بوب السيارة واني عفت غراضي وركضت بكل قوتي اتجاه الحي الي ساكنة بي اعرف اكو هناك سيارة شرطة دوم واكفة هناك ركضت بكل روحي اريد اصل التفت السيارة السودة كدامي وسدت الطريق رجعت بالاتجاه المعاكس ركض اكو سوبر ماركت زغير بنهاية هذا الشارع السيارة حتوصلني ماجنت اعرف ان جسمي يكدر يركض بهاي السرعة صار السوبر ماركت يبين يالله بقى ١٠ امتار و اوصل صرت اصيح وانادي اريد احد يطلع ينتبهلي انجريت من ملابسي و وكعت بالكاع اتصارع مع واحد من الملثمين كدر يكتفني ويدخلني للسيارة اصيح بكل صوتي بكل حيلي حاولت افلت منوماكدرت بعد ما دخلني للسيارة حسيت بجكة ابرة بيدي وراها رخت ادينو وعافني مالحكت افرح الا واحس الدنيا ضلام