نبغيك بزز منك

💞بقلم:نسرين💞

فدرب سلطان، الزنقة ما كتنعسش، والحيط كيحفظ كل كلمة، كل ضحكة، وكل دمعة طاحت بلا ما يشوفها حد.
وسط الزحام، وسط الروائح ديال الماكلة والحديد والعرق، كاينين هوما... أربعة ديال الوجوه، وكل واحد فيهم شايل عالمو فصمتو، فغواتو، ولا فهدرتو.

إكرام، ما كتسكتش، لسانها حاد ولكن قلبها رطب، كتخبي الحنان تحت وجه مجبد وكلام جارح.
إحسان، كتحس أكثر ما كتهضر، ساكتة ولكن فالصمت ديالها ألف كلمة، كتجر وراها حكاية خلاتها كتخاف تعيش بصدق.
آسر، التيسكو، لسانو شاعري ولكن قاصح، كيفضح ويخبي فآن واحد، كيشعل العافية بكلمة ويطفيها،بنظرة.
حيدر، الكايد، البارد فالمظهر، ولكن الداخل ديالو حرب، كيشوف بلا ما يهضر، وكيحسبها كل مرة قبل ما يدّي الخطوة.

ووسط درب سلطان، بين القهاوي، والزناقي اللي دايزة بعضها، غادي تولد القصة... ماشي حب بسيط، ولكن حب بزّز...
بزّز منهم، بزّز من الماضي، وبزّز من الحومة اللي كتعرف كلشي ولكن ما كترحم حد.