After the Pain

Si Keirra ay isang matagumpay na nurse sa ibang bansa at isa ring kilalang researcher na may mga nailathalang pag-aaral sa larangan ng medisina. Sa kabila ng kaniyang abalang buhay sa abroad, nagdesisyon siyang umuwi sa Pilipinas upang magsagawa ng panibagong pananaliksik. Layunin niyang makahanap ng mga taong handang maging bahagi ng kaniyang pag-aaral bilang mga respondent. Isang buwan siyang nanatili sa bansa, nagtutungo sa iba't ibang lugar, nakikihalubilo sa iba't ibang komunidad, at masigasig na isinasagawa ang kaniyang layunin.

Habang narito sa Pilipinas, paulit-ulit siyang kinukulit ng matalik niyang kaibigang si Kate na dumalo sa kanilang college reunion. Ngunit ilang beses niya itong tinanggihan-hindi dahil sa abala siya, kundi dahil ayaw niyang balikan ang mga alaala ng nakaraan na minsan na niyang sinubukang kalimutan. Isa na rito ang taong minsang naging dahilan ng kaniyang pagluha at pagkawasak.

Ngunit dumating ang isang gabi kung saan muling nag-usap si Kate at Keirra. Sa kanilang masinsinang pag-uusap ay pumayag na pumunta si Keirra.

Sa mismong araw ng reunion, dumalo si Keirra nang may halong kaba at pangamba. At sa pagdating niya, agad niyang napansin ang presensya ng taong minsang nagpasaya pero kalauna'y nagwasak sa kaniyang damdamin. Nagtangkang makipag-usap ito at humingi ng tawad. Sinubukan nitong muling manumbalik sa kung ano sila noon, ngunit mariing tinanggihan ito ni Keirra.

Ngunit sa hindi inaasahang pagkakataon, sa isa sa mga lugar kung saan siya nagpunta upang makapanayam ng mga respondent, muli na namang tumibok ang kaniyang puso.