The Broken Ring

May mga taong naniniwalang ang oras ay hindi na kayang balikan.
Ngunit paano kung isang umaga, pagkagising mo, nasa harap mo na naman ang araw na matagal mo nang ipinagluksa?

Si Keira Del Seviola ay hindi kailanman naniwala sa himala. Para sa kanya, ang nakaraan ay isa lamang koleksiyon ng mga alaalang hindi na mababago. Hanggang sa magising siya sa araw na dapat sana'y pinakamasayang araw ng kanyang pamilya-ang araw ng kasal ng kanyang tiyahin at tiyuhin.

Isang araw na hindi kailanman natuloy.

Sa kasalukuyan, ang kanyang tiyahin ay nabubuhay na parang anino ng dating sarili. Napilitang bumuo ng panibagong pamilya, ngunit ang puso ay nanatiling pag-aari ng lalaking hindi na nakabalik. Ang bawat sulok ng kanilang bahay ay puno ng mga litrato nilang dalawa-mga ngiti, mga pangarap, at mga alaalang hindi kailanman nabigyan ng pagkakataong maging habang-buhay.

Ngunit paano kung ang lahat ng pinaniwalaan nilang aksidente ay isa lamang kasinungalingan?
Paano kung ang pagkamatay ng lalaking iyon ay planado mula pa sa simula?

At paano kung ang taong may kagagawan nito ay hindi isang estranghero... kundi isang taong matagal nang nakaupo sa kanilang hapag-kainan?

Sa pagkakataong ito, hindi lamang buhay ang kailangang iligtas ni Keira.

Kailangan niyang baguhin ang isang kapalarang isinulat na ng dugo, pagtataksil, at pag-ibig.
Sapagkat sa mundong ito, hindi lahat ng singsing ay simbolo ng pangakong walang hanggan.
May mga singsing ding isinusuot bago tuluyang wasakin ang isang buhay.