Ivah and the Hidden Gates of Mahandala

SUMPA. Ganito ang tawag kay Ivah sa kanilang bayan-malas, tanda ng masamang kapalaran.
Nagmula man siya sa makapangyarihang angkan ng mga Suwilan-mga manggamot at gabay ng mga espiritung nawawala- hindi niya minana ang kanilang sagradong kapangyarihan. Dahil dito, hindi siya makapasok sa mundong espiritu, kung saan pinaniniwalaang nawala ang kaluluwa ng kanyang ina.

Hanggang sa isang gabi, isang delivery ang nagdala sa kanya sa harap ng Dakilang Pintuan ng Virinan-isang pintuan ng paghuhukom, at lihim na lugar ng pagsasanay ng mga Soul Sealer. Bumubukas lamang ito tuwing ikapitong kabilugan ng buwan ng taon at ngayon, siya'y na-trap sa loob.

Para kay Ivah, ito na marahil ang tanging pagkakataon upang matuklasan ang katotohanan tungkol sa kanyang ina. Ngunit kailangan niyang itago ang kanyang tunay na pagkakakilanlan at magpanggap bilang espiritu mula sa Silangan sapagkat kung mabubunyag ang kanyang pagkatao, mabubura ang kanyang kaluluwa mula sa mundong mortal at espirituwal... na para bang hindi siya kailanman nabuhay.

Sa tulong ng dalawang misteryosong mandirigma mula sa Silangan, kailangang magsanay ni Ivah bilang isang Khadir, isang Soul Sealer.

Paano haharapin ni Ivah ang matitinding pagsubok sa mundo ng mga espiritu nang walang kapangyarihan? Matatagpuan ba niya ang kanyang inang matagal nang nawala, o mas marami siyang madidiskubreng lihim na higit pa sa kanyang inaasahan?