liham

para sa mga salitang hindi maipagtapat, mga bulong na ipinahihiwatig na lamang sa buntong hininga at kibit-balikat.

para sa mga sandaling ang tanging tinig ay hibik, para sa mga panahong sariling palad lamang ang pamunas at pantapik, para sa mga minutong isang segundong yakap lamang ang maibibigay.

mga tugmang nais ipahatid sa mundo o marahil mga salitang hangad ding maiparating sa sarili . . .

para
sa anino ng nakaraan
sa repleksyon ng kasalukuyan
at kulay ng kinabukasan

nawa ay makarating ang liham na ito sa lahat ng luha at pangungulilang inililihim pagsapit ng takipsilim.