Sunflower Dreams [COMPLETED]

Mahirap ang buhay, lalo na kapag wala kang pera, pero para kay Chantina, mas mahirap pa rin ang maging katulong ni Poseidon Montellier.

Masungit, palaging mainit ang ulo, perfectionist, at hindi puwedeng ma-late sa anumang utos nito. Pero sa ngalan ng pera at sa pangarap na matagal na niyang gustong maabot, tiniis niya ang lahat.

Isang araw, inalok siya nito ng tatlong milyon kapalit ng isang bagay na hindi niya inasahan - ang magpanggap bilang fiancée ng amo. Halos lumuwa ang mata niya sa laki ng halaga at muntik na siyang himatayin sa kondisyon, pero sa huli, pumayag siya.

Akala niya, madali lang ang magpanggap. Pero bilang fiancée ng isang bilyonaryo, kinailangan din niyang masanay sa mga bagong bagay. "Lean on my shoulder," "Hold my hand," "Hug me," "Kiss me" - mga utos na sa simula'y nakakailang, pero sa kalauna'y nakasanayan na rin niya.

Kung kailan sanay na siyang kasama ito, saka naman nagbalik ang ina ng mga anak ng lalaki. Mabilis pa sa alas-kuwatro, tinapos nito ang kanilang kasunduan at pinaalis siya sa mansiyon.

Parang binuhusan siya ng malamig na tubig, at doon niya napagtanto na hindi lahat ng papel na ginagampanan ay nagiging totoo.

Noon lang niya na-realize na mas mahirap ang magpanggap na masaya kaysa magpanggap na fiancée ng amo, at kahit tatlong milyon pa ang kapalit, hindi nito kayang punan ang lungkot at pangungulila niya sa taong natutunan na niyang mahalin.