PAGLALAYAG NG PUSO

Sa loob ng prestihiyosong Philippine Marine Academy (PMA), kung saan ang disiplina ay batas at ang damdamin ay dapat ilihim, tahimik na umusbong ang isang pag-ibig sa pagitan ng dalawang kadeteng parehong nangangarap - si Evander Villanueva, isang mahinahon at mapagkumbabang kadete mula sa Antique, at si Lucan Reyes, ang matapang, responsable, at hinahangaang upperclassman. Sa bawat tunog ng pito, hakbang ng parada, at pagsigaw ng "Sir, yes Sir!", unti-unting nabuo ang damdaming pilit nilang ikinubli sa uniporme.

Ngunit sa likod ng matitikas na tindig at seremonyang akademiko, dumaan sila sa pagdududa, selos, at panghuhusga. Ang pagdating ng ex-girlfriend ni Lucan na si Brianna, isang tourism student mula sa ibang unibersidad, ang unang malaking pagsubok sa relasyon nila. Habang si Evander ay umaasa sa payo at presensya ng kanyang matalik na kaibigang si Presley, patuloy siyang lumalaban sa sakit ng pagiging pangalawa - o baka hindi pa talaga siya ang pinipili.

Kasama ang kanilang mga kaklase at kaibigan na sina Kyle, Mateo, at George, at sa gabay ng mga instruktor, dean, at staff ng akademya, dahan-dahan nilang hinubog ang tiwala at paninindigan. Sa gitna ng mga lihim na sulyap, mga patagong hawak-kamay, at mga gabing puno ng pananabik at takot, lumalim ang kanilang pagmamahalan. Hanggang sa isang gabing tahimik, sa isang silid na walang ibang saksi kundi ang kanilang mga puso, nangyari ang halik na naging simula ng tunay na pagtanggap.

Ito ay kwento ng dalawang lalaking piniling magmahal sa mundo kung saan hindi iyon madali. Isang love story na hindi tungkol sa kung sino ang mas malakas, kundi kung sino ang handang ipaglaban ang nararamdaman sa harap ng mundong mapanghusga. Sa Likod ng Uniporme, may pusong handang sumugal - kahit sa gitna ng peligro, utos, at dangal.