Natanaw Sa Balintataw (Viaje En El Tiempo #2)

Cameron Chavez - Isang Photography student na may Hemophobia, bata pa lang siya ay nakaranas na siya ng malagim na aksidente sa sinasakyan niyang Bus, at magmula din 'non ay lubhang natatakot na siya sa tuwing makakakita ng dugo. Parehong doctor ang kanyang mga magulang kaya't nais din nila na maging doctor siya balang araw, ngunit ang matinding trauma niya sa dugo ang naghahadlang sa kanya upang hindi ito kunin na karera. Para kay Cameron ay may iba pang dahilan ang mga takot na nararamdaman niya bukod sa nangyaring aksidente. Sapagkat palagi niyang napapaginipan ang kung anu-anong senaryo kung saan may inaanod na babae sa malakas na alon ng dagat, may nakagapos at nakapiring sa may upuan, at higit sa lahat ay ang masaksihan ang Garrote na kung saan ay matagal nang hindi ginagamit na parusa sa modernong panahon.

Nais niyang makakuha ng kasagutan sa kanyang mga panaginip ngunit sarado ang isip ng kanyang mga magulang sa mga ganoong bagay. Isang araw pumunta si Cameron sa isang makasaysayang lugar para sa isang subject sa kanyang degree. Sa kakahanap niya ng magandang tanawin at perpektong anggulo, ay may natagpuan siyang isang lumang camera na base sa itsura at istruktura ay masasabi niyang nagmula pa noong taong 1800's. Dala ng kuryosidad ay hinawakan niya iyon, at bigla itong nagliwanag kusa itong nagflash at kasabay din nito ay bigla na siyang napunta sa taong 1842.