Tawag ng Karagatan

Sa isang maliit na baybaying baryo, namumuhay si Agua, isang studyante, mangingisda, at simpleng dalagang maagang namulat at sanay sa hirap ng buhay. Araw ay ginugugol niya sa pag-aaral, habang gabi naman ay sa pangingisda upang matustusan ang pangangailangan ng kanyang ina at nakababatang kapatid. Hindi siya nagrereklamo-para sa kanya, sapat na ang liwanag ng buwan sa gabi, at ang mga ngiti ng kaniyang pamilya sa tuwing may pagkaing naihahain sa hapag.

Ngunit sa mismong gabi ng kanyang ika-labingwalong kaarawan, maraming pagbabagong nangyayari sa kaniyang katawan at kasabay nito'y isang mahiwagang liwanag ang bumalot sa kadiliman ng dagat. Mula sa alon ay lumitaw ang mga nilalang na hindi pa kailanman nasilayan ng tao-katawan nila'y parang sa tao ngunit sila'y may kaliskis ng isda at tinig na wari'y isang instrumentong bibihag sa kaluluwa ng isang tao. Tila isang panaginip ang mga pangyayari ngunit hindi maipagkakaila ang hiwaga ang kapangyarihang dala ng mga kakaibang nilalang. Sa kanilang mga tinig ay ipinahayag ang katotohanang si Agua ay hindi isang karaniwang dalaga, kundi ang itinakdang mandirigma ng Bathaluman ng Buwan, ang nilalang sa propesiya sa mundo ng Avatelerya.

Gumuho ang mundo ni Agua sa pagitan ng dalawang buhay-ang mundong kanyang kinalakihan at ang kaharian na ngayon ay humihingi ng kanyang tulong at pamumuno. Sa bawat hampas ng alon, tila hinahati rin ang kanyang puso: mananatili ba siyang kasama ang pamilyang bumuo sa kanya, o susunod sa tawag ng tadhana bilang tagpagtanggol ng karagatang kanyang pinagmulan? Ang gabi ng kanyang kaarawan ay siyang naging simula ng kanyang tunay na paglalakbay-isang kwentong mag-uugnay sa lupa at dagat, sa tao at mga nilalang ng karagatan, sa pag-ibig at kapalaran.

Date Started: October 19, 2025
Date Ended:
Status: ON GOING