وثاق جلهوم

مد إيده، وبدأ يشيل الملاية البيضا اللي فوق الحاجة الملفوفة كل طبقة يشيلها الصوت يعلى، وهو بيشيل حس بإيده بتسقع، وبتتشل، ووشه بدأ يعرق، لحد ما شال آخر طبقة، ماكانش فيه جثة، كان فيه مراية، مراية كبيرة بإطار دهبي، باين عليه إنه من القرن اللي فات.
بس المراية ما كانتش بتعكس وش عمر لأ.
كانت بتعكس أوضة تانية، أوضة فيها سرير خشب صغير، وعيل مربوط من أيديه ورجليه، والعيل بيصرخ وبيعيط بصوت متقطع، والصوت هو نفس اللي عمر سمعه من شوية.

على طرف السرير، كان فيه ست لابسة سواد، وشها مش باين، قاعدة ساكته، وما بترمشش.
المراية بتعرض حاجة مش موجودة في القصر، أو موجودة في حتة تانية من القصر، بس ممنوعة عن العين.

عمر بص لنفسه، وبعدين للمراية، وقال بصوت مهزوز :
ــ "دا أنا؟!!"

وفجأة الست اللي جوه المراية لفت وشها، ولأول مرة شاف عينيها، كانت عيون أمه بس مش بنفس الحنان، كانت ميتة!!! ميتة وباصة عليه.
وعينها بتقول:
"انت نسيتني؟"

عمر وقع على ركبه، دماغه بتلف، ووشه غرقان عرق، وودانه بتزن.
المراية بدأت تتهز، والأوضة اللي فيها العيل، اتملت نار، والست اللي كانت قاعدة اختفت، والعيل لسه مربوط والنار بتقرب منه.
عمر صرخ:
ــ "كفاية!"