Panginorin

Dalawang mundong magkalayo, sa iisang panginorin nagtagpo.

Si Saige Saoirse Salazar ay isang Culinary chef at ang kampeon ng bake off competition sa Spain, ngunit sa halip na magkaroon ng bagong simula, nagising siya sa isang panahong hindi kanya, sa katawan ng isang dukhang tindera ng kakanin, at sa mundong walang awa sa mahihina. Isang maling salita, isang maling hakbang, at tapos na ang lahat.

Sa panahong ito, narito ang Heneral na kilala sa hinaharap bilang isa sa mga kinatatakutan ng lahat, si Heneral Santiago Nicolas Lafuente ang tirano ng Timog silangan. Pumaslang ng limang daan na tao, kinamumuhian ng bayan, at kinatatakutan ng mga naghimagsik.

Ipinangako ni Saige sa kanyang sarili na iiwasan niya ito kahit anumang mangyari. Mananatili sa gilid, at Mabubuhay nang tahimik hanggang makabalik sa hinaharap.

Ngunit ang tadhana ay may kakaibang panlasa. Sa gitna ng isang marangyang piging, napansin ng Heneral ang kanyang niluto, isang pangkaraniwang pagkain para sa panahon nila na nag iwan ng marka sa panlasa ng lalaking hindi sanay masurpresa. Isang pagkakataong hindi kailanman hiniling ni Saige, ngunit hindi rin niya matakasan.

Ang kakayahan at talento ay siya ring naging dahilan ng kanyang kapalaran. Sa isang iglap, mula sa pagiging isang hamak na tindera, napunta siya sa pinaka-mapanganib na posisyon, at ito ay bilang personal na kusinera ng lalaking kayang pumatay sa isang utos lamang, at walang ni katiting na pagsisisi.

Makakaya kaya ng dalagang ito na mabuhay o ang sarili niyang puso ang unang susuko?