MARYAGAH

Rayuwar ɗan adam ɗauke yake da sauyin ƙaddara walau mai kyau walau kuma mara kyau wani lokacin Jarabawa ta kan zo ma bawa ta chukurkuɗaɗɗiyar hanya. Qadr wata aba ce mai tafiya da jarabawar mahallicin sammai da ƙassai, Allah yana rubuta ta ne a cikin littafin ko wani bawa wanda yake zar tar da hukuncin yin hakan tun bawa na cikin mahaifiyar sa, Kuma ya shaida mana cewa 'Lallai muyi imani da ƙaddara mai kyau da mara kyau', Duk nacin mutum bai isa ya yi tsalle ya dira a shafi na gaba na littafinsa ba ba tare da ya kutsa kansa a shafin baya ba, kenan "Ba a shan zuma sai an sha harbi'

Lokaci na tafiya kamar kiftawar ido Yayin da zamani yana sauyawa tare da sauyin rayuwa. A shekarun baya da suka shude duk da bambancin shekara amma mutane na tausaya wa juna tare da taimakon juna, fahimtar juna bugu da kari ƙauna tana mulki. Sai dai kuma mugaye sun bayyana, azzalumai sun yawaita, sai masu kyawawan halaye suka raunana.

Amma a yau tafe nike cikin duniyar da ni kadai nike ganin kai na..... Kafin zuwan yanzu duniyar kyau take min, sai dai kuma sa'in da abubuwa da dama suka sauya na koma ina kyamar ta, Wasu sukan ce da su kyamaci duniya gwara duniyar ta kyamace su....A halin da na tsinci kai na bangon da na dogara dashi don neman rahamar Ubangiji ya rushe min tawa rayuwar, silar rushewar da ta tarwatsa dukkanin farin ciki na da buri na.