Tulak ng Bibig, Kabig ng Dibdib

Musmos pa lang ay malinaw na sa kaisipan ni Benedict Emmanuel del Rosario na siya'y may pagtingin sa kanyang kababata. Hindi ito isang lihim at mas lalong hindi ito tahimik; ito'y singlakas ng kanyang bunganga't singlinaw ng kanyang mga mata.

Samantala, si Hanz Dwayne Villamor ay tila tibi sa digmaan ng damdamin, sa punto na minsa'y nagmumukha na siyang sinungaling. Hindi mawari ni Ben kung ano nga ba ang kinatatayuan niya sa buhay nito - kung kaibigan lang ba o higit na - dahil anumang salitang binibigkas ay siya namang salungat sa kilos na pinapakita.

Hindi naman sa naiinip na si Ben, sadyang nais niya lang ng katiyakan sa kabila ng kanyang paghahabol - isang bagay na hindi mabibigay sa kanya ni Hanz sa kasalukuyan. Dala ng kanyang pagkawalang-taros at kalunos-lunos na pananabik, siya'y tumungo sa isang manghuhula't pinabasa ang kapalarang nakaukit sa kanilang dalawa ng kababata.

Kasabay nito'y isang bagay na sa kanya'y ibinilin: "Patakan ng gayuma ang inumin ng binata kung nais mo siyang mapaibig."