Bangkay Ma'y Namamana

Maihahambing ang masalimuot na kasaysayan sa isang sirang plaka, at si La ang siyang maestro ng musikang kinagigiliwan ng madla. Sa bawat kumpas ng kaniyang mga kamay, isang henerasyon ang nalulunod sa matamlay na paghihintay.

Tunay ngang may mga sugat na ayaw maghilom sa kabila ng pagkakabaon. At kung naibaon man, tila isa pa rin itong bangkay na paulit-ulit na pinagpapasa-pasahan sa ilalim ng pareho pa ring araw at buwan. Kahit ilang tasa pa ng mapait na kape ang lalaklakin, at kahit maging kasingtalas na ng patalim ang dilang marumi, nananatili pa rin ang ingay ng katahimikang minana ni La mula sa kaniyang angkan.

Sa mundong ang liwanag ay sadyang ipinagkakait, masasaksihan pa ba ang tinatawag nilang bahaghari? O mananatili na lang bang bilanggo sa parehong lupain, habang ang mga anino ni La ay patuloy na sumasayaw sa ibabaw ng mga pangarap ng iba?