QATİL KİMDİR?!

"QATİL KİMDİR?!"
(dedektiv roman)
Yazar: ELŞƏN İSMAYIL

Qeyd: romandakı obrazlar və hadisələr tamamilə uydurma olub reallığı əks etdirmir. Roman heç bir mesaj xarakteri daşımır, sadəcə maraq üçün yazılıb.

*** *** ***

Cəlil Xasməmmədli öz lüks "Range Rover"inin içində oturub qarşısındakı mənzərəyə baxarkən, ürəyinin döyüntüsünü qulaqlarında hiss edirdi. O, 60 illik ömründə çox çətinliklər görmüşdü, lakin bu dəfəki mənzərə onun təkcə karyerasını deyil, bütün dünyasını alt-üst edə bilərdi. Avtomobilin salonundakı bahalı dəri qoxusu belə, onu kənardakı o dəhşətli reallıqdan uzaqlaşdıra bilmirdi. Cəlilin baxışları 2 nömrəli nəhəng qülləli kranın uclarına dikilmişdi. Orada, kranın polad qolundan asılmış insan bədəni küləyin hər əsməsində ritmik şəkildə yellənirdi. Bu, Aleksey Jukov idi - Rusiyadan gəlmiş 70 yaşlı milyarder, Cəlilin həm ən böyük investoru, həm də ən çətin ortağı...