Objection, Your Heart

Sa prestihiyosong University of the Philippines Diliman, kung saan ang talino ay sandata at ang salita ay parang bala, muling nagkrus ang landas ng dalawang taong pilit tinatakasan ang nakaraan.

Si Kalilea Aida San Jose-isang iskolar na lumaki sa hirap, sanay lumaban para sa bawat oportunidad, at hindi kailanman pinayagan ang sarili na matalo-lalo na sa isang mundo na hindi ginawa para sa kanya.

At si Stephan Andrei Montemayor-isang lalaking ipinanganak sa pribilehiyo, hinubog ng kontrol ng kanyang mga magulang, at natutong sundin ang batas... kahit kapalit nito ang sariling damdamin.

Dati, sila ang unang naging pahinga ng isa't isa.

Ngayon, sila ang pinakamapait na laban.

Bilang magkapartner sa Pre-Law debate class, napipilitan silang magsama sa iisang entablado-kung saan ang bawat argumento ay may kasamang galit, ang bawat tingin ay may bakas ng nakaraan, at ang bawat salita ay tila unti-unting naglalapit sa kanila sa katotohanang matagal na nilang tinatanggihan.

Ngunit paano ka lalaban sa isang taong minsan mong minahal...
kung siya rin ang dahilan kung bakit ka nasaktan?

At paano mo ipagtatanggol ang sarili mo...
kung ang puso mo ang kalaban?

Isang kwento ng pag-ibig na iniwan sa gitna ng katahimikan,
ng mga salitang hindi nasabi,
at ng dalawang pusong kailangang matutong magmahal muli-hindi bilang dating sila, kundi bilang mga taong nagbago na.

Ex to enemies to lovers. Slow burn.
Kung saan ang pinakamahirap na kaso... ay ang muling piliin ang isa't isa.