Ang Huling Bantay ng Tunnel

Labing siyam na taong gulang si Adrian Zipagan, isang tahimik na freshman sa Isabela State University, nang maatasang magsaliksik tungkol sa kasaysayan ng City of Ilagan. Akala niya'y ordinaryong research requirement lamang iyon, hanggang matagpuan niya sa isang lumang museo ang isang kalawangin at halos nakalimutang helmet ng sundalong Hapones na may nakaukit na pangalang H. Yamazoe. Pagkatapos noon, nagsimula ang mga panaginip-isang madilim na tunnel, mga sigaw ng digmaan, at isang binatang paulit-ulit lumilitaw sa kanyang isip: si Hiroshi.

Habang lumalalim ang pagsasaliksik ni Adrian tungkol sa Japanese Tunnel ng Ilagan, lalo ring nagiging malinaw ang mga alaalang tila hindi naman kanya. Hanggang isang araw, tuluyang bumigay ang hangganan ng kasalukuyan at nakaraan. Nagising siya sa Nagali noong Ikalawang Digmaang Pandaigdig at nakilala si Hiroshi Yamazoe, isang labing siyam na taong gulang na sundalong Hapones na nakatalagang bantay sa tunnel.

Sa gitna ng digmaan, panganib, at nalalapit na pagbagsak ng tunnel, nabuo ang isang lihim na pag-ibig na ipinagbabawal ng kasaysayan. Ngunit paano kung ang taong minamahal mo ay kabilang sa panahong nakatakdang maglaho? At hanggang saan mo kayang labanan ang kasaysayan para lamang manatili ang isang alaala?