Ang tanging hangad ko lang Ay Ikaw

Nang lumaki si Joyce Flores nang walang alinmang alaala sa kanyang nakaraan, tanging ang pagmamahal ng nakakita sa kaniyang si Lola Ines ang naging gabay niya. Matapos ang ilang taong pagsusumikap at pag-aaral sa Maynila, nagdesisyon siyang bumalik sa Mindanao-hindi lamang upang alagaan ang matandang nagpalaki sa kanya, kundi upang alamin ang katotohanan sa kaniyang tunay na pagkatao.

Ang hindi alam ni Joyce, ang dugo ng isa sa pinakakilala, mayaman, at makapangyarihang angkan sa rehiyon ang nananalaytay sa kaniyang mga ugat. Siya si Amirah Abdurahman, ang matagal nang nawawalang bunsong kapatid ni Rasmia Abdurahman-Ahman, na kasal sa tanyag at respetadong lider na si Commander Ramil Ahman.

Sa kaniyang paghahanap ng kasagutan, pumasok si Joyce bilang isang contractual social worker sa Kapitolyo ng pinakamalaking probinsya sa Mindanao. Doon, makakasalubong niya si Governor Ram Villaluna-ang pinakabatang Gobernador ng lalawigan na kilala sa kaniyang matalas na pag-iisip at dedikasyon sa kapayapaan, ngunit lihim na matatagpuan ang sariling natutulala at nanginginig ang dibdib sa tuwing masusulyapan ang dalaga.

Habang unti-unting nagtatagpo ang landas nina Ram at Joyce sa gitna ng mga tungkulin sa Kapitolyo, dahan-dahan ding nabubunyag ang mga lihim ng nakaraan.

Kakayanin ba ng umuusbong na pag-ibig sa pagitan ng batang Gobernador at ng simpleng social worker na harapin ang bigat ng katotohanan kapag nalamang ang babaeng kaniyang minamahal ay ang nawawalang tagapagmana ng pamilya Abdurahman?

Isang kwento ng paghahanap sa sarili, pag-ibig na naghihintay sa tamang panahon, at ang kapangyarihan ng pamilya at kapayapaan sa Mindanao.