حب الوطني

قولو خير يا ناس بلدنا
ويلا نقعد في الصقيعة
وبالهداوة بلا عداوة
نرسم أحلامنا البديعة
ونفهم انو الواطة ديه
عامرة خيراتها ووسيعة
ومافي زولا فينا يقدر
ينكر العازة ويبيعها
******
ملو لو شلنا الضغاين
بالخصال المستحبة
وكيف نحسو وطنا غالي
ومن سواد العين أحب
نملأ بالحب والتصافي
وبيهو ننهض حبة حبة
ونبقى واحد في طريقنا
ونعبد الله بالمحبة
*****
الرحيب شايلنا واكتر
والنعيم الفيه كافي
والسماح الفي بلدنا
زي غناوي السيرة صافي
في الحكايات السوالف
نحن زينا اصلو مافي
مالو بالهمة قمنا
وقلنا للبلدات عوافي
******
والشمس ما بت امس
في الحقيقة ابوها باكر
وامها الوالداها غنية
جالبة افراحنا البواكر
نيلنا مسدار المواسم
مره صافي ومره عاكر
وانت اروع ياوطنا
في عيون طالب بزاكر
******
نتفق في حبو لازم
ونختلف من اجلو عادي
ومانخلي خلافنا يصبح
ضدنا وصالح الاعادي
الصدور الطامحة عزة
تبقى مطمورة مبادي
وبكره من صفحه عيونا
نمسح اللون الرمادي .