I AM NUMBER 10: BOOK I

Sa gitna ng normal na takbo ng mundo ay biglang may kakaibang pagsabog ang nangyari sa kalangitan.

Isang araw lamang ang itinagal upang tuluyan na ngang mabago ng kakaibang pagsabog ang buhay ng lahat nang nakatira sa daigdig.

Ang minsan nang pinapanaginipan ng ilan ay nangyari na nga. Nagkaroon ng panibagong kontinente, kakaibang kakayahan, panibagong uri ng mga hayop at halaman, at higit sa lahat, nagkaroon din ng panibagong takbo ang mga bagay-bagay.

Sumiklab ang makabagong digmaan, diskriminasyon na hindi matapos tapos at panibagong kontinente at mga bansa.

Sa gitna ng napakabilis na ebolusyon ng sangkatauhan ay may isang bagay pa rin ang nananatiling misteryo sa lahat.

Saan nga ba nagsimula ang kakaibang pagsabog? Ano ang dahilan nang lahat ng ito? Diyos nga ba ang may gawa o sadyang pinaglalaruan lamang ang lahat upang tuluyan nang masira ang mundo?

Sa kabila ng napakaraming tanong na hanggang ngayon ay wala pa ring kasagutan, may isang babae naman ang tahimik na nakaupo sa hagdan ng isang napakalaking mansyon.

Unti-unting nagiging kulay puti ang bawat hibla ng mataas na itim na buhok nito. Bigla ring naging isang matingkad na kulay dilaw ang kanyang mga mata na dati ay itim.

Maloko itong ngumisi at napahalumbaba habang nakapatong ang kanyang siko sa kanyang tuhod.

"Find me if you can. After all no one really knows that I am number 10. Come, I have all the answer."