Second Hand Love (Completed)

Pagpapanggap at pagkukunwari. Ito ang kanyang expertise. Ang kanyang kabuhayan.

Bilang undercover agent ng isang highly classified agency ng pamahalaan ng Pilipinas na sumusugpo sa pagkalat ng mga ipinagbababawal na gamot, kinailangan ni Celestine "Les" Rosete na bumalik sa baryong sinilangan at kinalakihan at magpanggap bilang isang teacher upang lihim na imbestigahan ang natanggap nilang impormasyon na may namumugad ditong isang malaking drug syndicate.

Subalit ang kanyang pagpapanggap ay natuklasan ni Roman, ang lalaking pinagkalooban niya ng matamis na oo subalit pinagkaitan ng pagmamahal noong sila ay nasa high school pa lamang. Ang lalaking ginamit niya ang pagmamahal upang makamit ang pagmamahal ng iba.

Roman Jovencio, the man with the sexy walk at isa ng matagumpay na negosyante. Pumayag ito sa kanyang pakiusap na itago ang kanyang lihim, for a price. Magpapanggap silang magkasintahan at gagawin nila ang mga bagay na ginagawa ng magkasintahan na ipinagkait niya dito noon.

Sa lahat ng hinawakang assignment, pinaka-mahalaga para kay Les ang mabuwag ang sindikatong unti-unting lumalason sa kanyang mga mahal sa buhay at mga kababaryo. Kaya wala siyang pagpipilian kundi ang sumang-ayon sa kagustuhan ni Roman. Wala rin siyang nagawa ng mabihag nito ang kanyang pihikang puso. Ang pagpapanggap ay nauwi sa totohanan. Sa piling ni Roman, naranasan niya kung paano magmahal at mahalin ng walang kapantay, natuklasan ang isang tunay na pag-ibig na naging lahat sa kanyang buhay.

Kaya paano niya tatanggapin ang sinasabi ng ilang kakilala na isa lamang siyang second hand love? Na ginawa lamang siyang pansamantalang pamalit ni Roman habang hinihintay na bumalik sa bansa ang babaing tunay na minamahal at nakatakdang pakasalan. Ang lahat ba ng kanilang pinagsaluhan at maging ang pagkatao ni Roman ay pawang pagpapanggap at pagkukunwari lamang?