اسكريبت
" لو مكتوبلنا نتقابل هتتقابل "
الفتاة : أنت حيوان !
الجرسون : طب حضرتك بتشتميني ليه يا فندم ؟
الفتاة : وكمان بتبجح فيا أنا مش عارفه الأشكال دي بتجبوها منين !
الجرسون : يا فندم أنا عاوز افهم أنا عملت أيه عشان حضرتك تشتميني ؟
الفتاة : ما أكيد عملت حاجة ولا أنا مجنونة مثلا هشتمك من غير ما تعملي حاجة
الجرسون : طب أنا عملت أيه ؟
الفتاة : مش أنا قولتلك يا متخلف أنت أني بحب القهوة سادة مش زيادة
الجرسون : يا فندم والله جبتهالك سادة
الفتاة : يعني أنا كدابة يعني ولا أيه مش فاهمة ، ده أيه القرف ده !
"فتدخل رجل كان يجلس على كرسي بجوارهم"
الرجل : أنتي بتشتمي الراجل ليه ؟
الفتاة : و أنت مال أهلك أنت
الرجل : اتكلمي بأسلوب كويس يا بنتي واعرفي أنتي بتتكلمي مع مين
الفتاة : هتكون مين يعني ؟
الجرسون : ده سيادة المقدم عمرو ماهر
الفتاة : اه ظابط يعني ، مش فاهمه برضه المفروض أخاف ولا أيه !
الرجل : لا المفروض أنك تعتذري للراجل دلوقتي ، لا إلا قسما بشرفي لهسجنك
الجرسون : خلاص يا باشا أنا مسامحها هي برضه قد عيالي و أنا ميرضنيش أنها تتحبس
الفتاة : ههه حنين أوووي
"فعاد المقدم عمرو إلى مكانه وجلست الفتاة لتتناول القهوة ثم تركت الكافية و رحلت "
"وفي اليوم التالي جاءت إلى الكافية فرأت المقدم عمرو جالسا فتوجهت إلى مقعده "
الفتاة : أنا آسفه
المقدم عمرو : آسفه على أيه ؟
الفتاة : على أسلوبي وكلامي بتاع امبارح
المقدم عمرو : أنتي مزعقتليش أنا أنتي زعقتي للراجل فالمفروض تعتذري للراجل مش تعتذريلي أنا
الفتاة: منا أعتذرتله
المقدم عمرو : تمام كويس
الفتاة : بس أنت نرفزتني برضه
المقدم عمرو : أنا مش فاهم بصراحة ، أنتي بتفكري ازاي !
الفتاة : معلش يمكن أكون عصبيه بس أعمل ايه من ضغوط الشغل والله
المقدم عمرو : انتي بتشتغلي أيه ؟
الفتاة : بشتغل مهندسة كمبيوتر
المقدم عمرو : نعم ؟ وعندك ضغوط !
اومال لو بتشتغلي ظابط زيي كنتي موتي نفسك ولا ايه ؟
الفتاة : لا مش قصدي بس انا عارفه أكيد أنكم بتتعبوا
المقدم عمرو : طب كويس انك عارفه
، معلش أنا مضطر أني امشي دلوقتي
الفتاة : هشوفك تاني ؟
المقدم عمرو : أنا هكون موجود بعد بكرة باذن الله
الفتاة : وأنا هكون موجودة بكرة باذن الله
المقدم عمرو : اممم شكل كده مش مكتوبلنا نتقابل فرصة سعيدة
الفتاة : أنا أسعد
وفي اليوم التالي ذهب المقدم عمرو لكي يفاجىء الفتاة ويجلس معها ولكنه رآها جالسه مع فتى وسيم يتحدثان مع بعضهم البعض فظن أنه خطيبها فعاد المقدم عمرو إلى بيته "
" وفي اليوم التالي ذهبت الفتاة لكي تفاجىء المقدم عمرو ولكن وجدته جالسا مع فتاة جميلة فظنت أنها خطيبته فعادت إلى بيتها "
" وبعد مرور 45 سنة "
"جاء عمرو مع حفيده يحيى إلى الكافيه "
عمرو : يااااه عارف ياض يا يحيى الكافيه ده من أجمل الكافيهات اللي بحب اقعد فيها
يحيى : ليه يا جدو ؟
عمرو : لأني قابلت في المكان ده بنت جميلة هي أه كانت عصبيه بس لطيفة بالرغم من عيوبها وكل حاجة فيها بس عجبني خفة دمها وكل حاجة فيها الصراحة
يحيى : ها وبعدين يا جدو ؟
عمرو : أخر مرة قبلتها هنا قولتلها مكنتش عاوز امشي خالص بالرغم من أني قعدت معاها مرتين بس كان أحلى وقت والله
يحيى : طب وشوفتها تاني ؟
عمرو : اه شوفتها في يوم كانت قاعدة هنا على نفس الترابيزة اللي أنا وأنت قاعدين عليها دي
كانت قاعدة مع ولد قدها تقريبا خطيبها بس أول ما شوفتها اتدايقت ومشيت
يحيى : ليه يا جدو ، حضرتك غيرت عليها أو كنت بتحبها ؟
عمرو : مش هنكر يابني أنا أعجبت بيها وحبيت القعدة معاها بس اتدايقت أووي لما شوفتها قاعدة مع حد غيري معرفش بقى أنا حبيتها ولا لا بس كل اللي اعرفه أني بحب أقعد معاها مبكونش عاوز حاجة من الدنيا ساعتها ، مجرد أني اسمع صوتها وأشوف عينها بحس أن الدنيا مش سيعاني
يحيى : الله يا جدو شكلك كنت بتحبها أووي
عمرو : باين كده يا يحيى
يحيى : طب حضرتك مجتش هنا تاني بعد كده ؟
عمرو : لا طبعا كنت موجود هنا أنا وأختي نورهان كنا قاعدين على الترابيزة دي قبل ما أشوف البنت اللي بحكيلك عنها وهي قاعدة مع خطيبها بيوم
يحيى : طب حضرتك متعرفش اسمها ؟
عمرو : لا ازاي عارفه طبعا ، اسمها كان اسم علي مسمى ، كان اسمها وردة وهي كانت وردة فعلا
يحيى : اسمها جميل
عمرو : أيه ده ؟
انا شامم ريحة البرڤان اللي هي كانت بتحطه ، هو فيه حد في الكافية غيرنا يابني ؟
يحيى : لا يا جدو
عمرو : تمام يلا بينا نرجع البيت أحسن جدتك ومامتك ينفخونا
يحيى : يلا يا جدو
"حينما غادر يحيى و جده عمرو من الكافية دخلت وردة ومعها حفيدتها مريم "
وردة : أهو يا ستي الكافية اللي بقولك عليه ، أيه رأيك فيه ؟
مريم : جميل يا تيتا
وردة : الكافية ده بحبه جدا رغم أني عملت مشاكل كتير هنا بس بحبه
مريم : وأيه سبب حبك للكافية ؟
وردة : اتخانقت مع جرسون قبل كده فاتدخل واحد كده وسيم وطلع في الاخر ظابط
مريم : أه وبعدين ؟
وردة : مفيش
مريم : عليا انا يا تيتا ؟
شكلك حبتيه صح ؟
وردة : الصراحة اه
مريم : طب وبعدين ؟
وردة : مفيش روحت ليه الكافيه تاني يوم فلقيته قاعد مع بنت كده شكلها خطيبته فزعلت وروحت البيت
مريم : وبعد كده مجتيش تاني هنا ؟
وردة : لا طبعا جيت هنا تاني يوم علطول كنت قاعدة هنا أنا و أخويا محمد
مريم : طب وبعدين ؟
وردة : ولا قبلين من ساعتها وأنا مشوفتهوش تاني
مريم : طب ومش هتتقابلوا تاني ؟
وردة : يا بنتي أنا أصلا معرفش هو ساكن فين ولا حتى أعرف رقمه فهنتقابل ازاي ؟
مريم : يعني كده خلاص مفيش أمل صح ؟
الفتاة : لو مكتوبلنا نتقابل هنتقابل .
- أحمد نادر 🖋️🖤
