SURI
TUSUN 42
DIKARANG DARA MELANJAN
Bedarat seduai iya meaki ngagai endur nganti bas,Jantang agi kekuchau laban doktor laki nya tadi. "Pagila lusa enti dik ngachau aku ,bai ke aku sengayuh dik nya,enda senduk asi Ini bai ku pagila ambi nyepik asai tekung senduk!" Ko Jantang kekuchau. Aki iya ke ninga nyau tetuchum meda ulah Jantang enggai bebadu kekuchau." Umbas nya kekuchau Endu,orang ninga kumbai orang gila dik legi,enda jauh tua tu alai orang nganjung dik tama tingkat 3 legi"ko Aki iya nundi sambil ketawa.
Ninga Aki iya nyebut tingkat 3 alu rampit mulut iya enda bejaku agi.Tang dalam ati din akai nadai nemu kitai,te bendar mih iya nyumpah tudah lutur nya tadi."Nyin bas aram angkat,umbas ngaga mua baka nya,iya tinggal ke Aki ba tingkat 3 dik legi"ko Aki iya baru nundi." Ishh Aki tu,nadai kami ka tinggal diak,ukai kami tu gila asuh tepu dalam nya"ko Jantang alu angkat narit jari Aki iya seduai iya pan lalu nepan bas pulai ke rumah.
Ba ward Sepital alai Suri masuk,Nanta gegining ngiga tudah Jantang." Nai kini indu bajik nya nadai di peda agi,nama nadai ba katil aka iya din iya"ko Nanta majak nyeling katil Suri. Jawan laban ke duduk nunga ke mua iya,meda mih Nanta Gegining Ngagai katil Suri." Sayau peda dik Lutur laki nyin ,gegining iya malik kitu,kada enda ngiga adik iya?"ko Jawan madah ke Suri. Malik Suri ngagai Nanta ke benung nyeling belalai ,Nanta tepeda ke Suri malik ngagai iya.
Nanta ngaga diri mansa ngagai katil bukai laban malu ke diri kena tangkap nyeling ngagai katil Suri."Malu asai kati tau kena tangkap nyeling ngiga madi orang,parai kumbai kanji legi"ko Nanta betelai kediri dalam ati. Suri enggau Jawan ketawa meda ulah Nanta ke sesalat enda nemu nama pengawa ke di gaga." Sayau enti Lutur nya bepangan enggau Jantang baka ni ko dik setuju dik?"ko Suri nanya Jawan."Aku ni ke dik sayau,enti nya manah ko dik nadai ga salah"ko Jawan.Nadai siku sida iya nemu Nanta nya anak menyadi apai Janin ti deka di sabung jadi enggau Jantang ,pia mega Nanta enda nemu diri dituku asuh jadi enggau Jantang.
Sekumbang kereja ba Sepital Nanta nyau jarang nemuai ngagai sida Ibu enggau Aya iya di rumah panjai ketegal ke mayuh pengawa ba Sepital. Mansa tudah Nanta tadi laban deka pulai laban udah chukup jam iya tukar shif ."Lutur,ulih dik kitu dulu "ko Jawan ngaggau ka tudah Nanta,dia dih ati Nanta kekesit takut laban irau ati enggai ke di anu.
"Lutur minta ampun dulu ngagai dik engka utai ditanya aku legi enda nyamai di dinga pending"ko Suri bejaku sereta minta ampun ngagai Nanta." Nama minta anpun dik empai madah kediri salah udah dulu minta ampun,sebut dulu baru ku nemu enggau silik"ko Nanta nyaut Suri. Sebedau Suri nampung jaku iya ,Suri malik ngagai Jawan dia Jawan nyagun ke pala.Baka ke setuju ngasuh Suri nerus ke utai di deka di padah ke iya.
"Lutur ,kati enti aku minta dik nyadi ke pangan madi aku ulih kini?ukai nama aku munyi nya,laban aku nemu lutur bisi ati ngagai iya,bisi dua tiga ari iya ngabas aku lutur sigi nyeling ari jauh,nya tadi ku meda pemerani Lutur nundi iya"ko Suri. Tekenyit tudah Nanta ninga Suri ke bejaku munyi nya iya lalu betelai dalam ati."Apuu kati ke indu tu tau nemu pengawa aku ngelamatu,pama mata iya tu tajam udu meda mata kitai"ko Nanta nyelai diri. Iya lalu enda nyaut Suri tang agi tegenung .
Meda Nanta tegenung Suri lalu nanya baru . Helo lutur agi bisi dia dik? Udah dini dik tadi?"ko Suri nundi Nanta."Eh,minta ampun nyau tegenung dulu tadi"ko Nanta nyaut enggau tuchum malu." Baka ni lutur ka dik?enti dik ka aku meri lumur talipun iya ngagai dik"ko Suri nanya. "Sapa enggai lumur indu bajik ngasuh ati celap mata enggai bebadu nyeling,tang enda patut aku madah diri ka,legi kumbai orang enda malu kitai" ko Nanta nyelai diri. Iya lalu nyaut Suri."minta ampun aka,ukai enggai ke madi dik,tang nganti aku mikir dua tiga ari tu dulu mih,enda alah kumbai orang nyau leluba legi,enti aku ka kada iya ka dah?"ko Nanta nyaut.
"Au mih lutur enti dik setuju dik madah ke aku lutur"ko Suri."Anang laun lutur enggai ke rumbau,enti rumbau putih mata anang nyesal"ko Jawan nyakut ke Nanta."Akai akih tu te ngasuh ati tu bebali dua,eh sabar mih pagila lusa madah,enti enda ampit nadai ko enggau mih ukai atur petara ke aku"ko Nanta bejaku ke diri."Mupuk dulu aku,pagila lusa nya mih ku madah"ko Nanta lalu mupuk.
Ba rumah panjai Jantang enggau Aki iya baru datai. Jantang lalu tama ke bilik .Aki iya lalu nuduk kediri ba ruai laban Ini Suri duduk diruai."Baka ni gaya endu Suri wai?"ko Ini Suri nanya." Nadai ngawa iya,engka ujung minggu tu pansut iya"ko Aki Suri."Baik mih enti pansut lama mat endu udah diau di Sepital"ko Bini Tuai Rumah nyaut. "Apai aku tu bisi utai ka tanya tu?ko indai Janin.
"Iya nama utai bangat ka tanya dik nya?nama ka belaki baru dik pia?"ko Aki Suri nundi indai Janin."Te seredah mih dik nya apai,aku tu ka nuku ke Jantang jadi enggau anak madi apai Dom,enti dik setuju aku nyuak ke tinchin dulu,ujung bulan kitai ngerami iya,nganti siku nya chuti,iya gawa ba Sepital nyadi Lutur "ko Indai Janin bejaku. "Nadai nya salah kapa nganti lama,enti setuju nadai mayuh jaku,ujung bulan mih seduai iya jadi,legi aku madah ke Jantang"ko Aki Suri lalu angkat ka tama ke bilik.
Jantang ke ninga ari bilik enda nyadi pansut ke ruai, iya lalu tama ke bilik tinduk laban ninga Aki iya ka tama."Kada sigat,anang jak baka gamal kera,parai kitai,tang enti sigat baka lutur tadi nadai ngawa " ko Jantang bejaku kediri. "Emm nyadi tunang orang enda bepeda mua mih aku tu,ngarapka sigat mih ehh nibuh ke sigat mih asal mih budi basa adat iya manah,sereta nerima aku Aki Enggau Ini udah chukup,nadai agi orang bukai ke enggau aku begulai enti ukai Aki enggau Ini,Seduai iya mih Apai enggau Indai aku,Aka Suri udah ga belaki sereta nguai ka enda nerima aja asal bisi nyupi kami tiga" ko Jantang murus mua iya lalu malik cermin.Dinga nyawa Aki iya ngaggau ari luar.Nadai utai bukai sigi deka nanya setuju tauka enda..
