😍{ كئيب الليل ياطفلة يغيب الكل لا غبتي }للكاتبة : أديم الراشد. 📃

💮. 80.81.82.83

..
*⩴|📖|₦:↜كئـيب اللـيل ياطـفــ👧🏻ـلة يـغـيب الـكل لاغبـتي❤️🤎.*

➖➖➖➖➖➖➖➖➖

نور جلست : امر عمي وش تبي اساعدك فيه
ابو ماجد جلس وهو محتار: نور انا فكرت كثير اشرح لعزام بس ماعطاني فرصه ولا عرفت اشرح ارسلت كثير يفهمونه بس عجزوا في عناده وقلت لنفسي يمكن اذا كلمته وشافني يحن علي انا مابي ادخلك في موضوع حساس لهدرجه عشان كذا ابيك اخذك معي البيت انتي ورعد وقولي اني قلت لك ان امه مريضه حيل عشان كذا رضيتي تروحين وخليه يجي هناك ياخذك واقدر اكلمه هناك وش قلتي
نور بخوف من عزام: مدري ي عمي احس بيعصب
ابو ماجد وهو يبتسم لها:تأكدي ان عزام يعصب على الكل ولا يعصب عليك محد يقدر يساعدني الا انتي
نور جلست تفكر شوي وبعدها قالت وهي تتمنى عزام يتصالح هو وابوه : طيب البس واجي
راحت نور ولبست ولبست رعد وطلعت لعمها رعد : عمه نور وين رايحين
نور : رايحين لتيته وعمه حور
رعد بفرحه: جد
ابو ماجد : اي تراك وحشتهم حيل
رعد ناظر ابو ماجد وتكلم: وينهم طيب انت تعرف مكاانهم
ابو ماجد : ايوه ي حبيبي اعرف مكانهم وبنروح لهم
كان ابو ماجد مبسوط على سوالف رعد اللي تجنن ويحس انه يرجع لسوالف عزام لما كان بسنه
٠٠٠٠
عند عزام قالوا له ان ماجد صحى راح للغرفه دخل وحصل ماجد يناظر السقف :السلام عليكم
ماجد بهمس :عليكم السلام
عزام قرب وهو يشخصه شوي ابتعد وجلس : الحمدلله المره هاذي عدت على خير
ماجد :انا ليش هنا
عزام جلس وهو يحس بقلبه يدق : انت كثرت في الشرب والزقاير وطحت تعبان جابوك هنا وزين انهم جابوك وقدرنا نعالجك لأنه لو طولت شوي وكانت الكبد بتتلف وتتأثر والكلى تفشل
ماجد صد بألم عزام دقق فيه يحسه فيه شي مو طبيعي تكلم لا إرادي :وش اللي خلاك تشرب لذا الدرجه اصلا ليش اتجهت للشرب انت تعرف انه حرام ولو احد مسكك بتكون بالسجن غير انه مضر
ماجد صد بضيق : مو بيدي
عزام حط يده على كتفه : ليش مو بيدك انت انسان كبير المفروض تكون فاهم هالشي شوف كيف حالك ما وراك اهل يخافون عليك
ماجد لف عليه: محد جاء سأل عني صح
عزام بهدوء : لا
ماجد صد بقهر : عندي اهل عندي كل شي عندي عايله كبيرة بس لو اموت محد درا عني
عزام انشد لكلامه :ليش تقول كذا
ماجد وهو يحاول مايبكي :ولا شي بس اكتب لي خروج بطلع
عزام:مقدر اطلعك انت تعبان حيل تحتاج رعايه خصوصا ان السم اللي كنت تشربه اثر عليك حيل
ماجد مارد عزام قرب وهو يقول : قولي همك وتأكد انه بسر لا تجلس كذا ضايق
اصر عزام على ماجد يتكلم وتكلم ماجد وصوته يختفي ويرجع من الغبنه وقال لعزام وضعه كله : مثل ماقلت لك امي اللي المفروض تدق وتقول وينك ارجع تاخرت وش صار لك تعبان جوعان فيك شي ماسوت ولا شي من هاذي ماتعرف اي شي الا الفلوس بس وطلعاتها وخرجاتها وسفراتها وفلانه وعلانه وماجد بالجدار ما همها اما ابوي لاهي في شغله وعياله ولا يدري عني واذا شافني مالي نصيب الا التهزيء
عزام: عياله اي عيال
ماجد: عنده عيال من زوجته الاولى كبار كانوا ضايعين مدري وش صار لهم حصلهم ورجعهم للبيت وقبل كم يوم جات اختي وزوجته
عزام: وليش ما جلست معهم
ماجد بضيق : ما تجرأت احس اني منبوذ الكل يكرهني ويخاف مني وكأني ذابح احد
عزام : الكل يخاف منك لانك تشرب
ماجد بضيق : كنت احسب اني اذا شربت بألفت انتباه امي وابوي لي وينقهرون علي بس للاسف ما فكروا وماحصلت نفسي الا اعتبره طريقه للانتقام من امي وابوي
عزام غمض بضيق وقال : جرب تدخل مع اخوانك طيب
ماجد : حاولت بس ماقدرت
عزام بضيق :الله يعين لا تضيق كلنا نفس الحال بس الظروف تختلف
ماجد : ليش انت وين اهلك
عزام بضيق :راحوا وتركوني يعني انا وياك نفس القدر
ماجد ناظر لعزام وابتسم: مدري وش اقولك لو اقدر اواسي واسيت نفسي
عزام ابتسم وهو يوقف :ماعليه وصللت مشاعرك المهم انا رايح وانت انتبه لنفسك ولأكلك طيب لا تخبص روق شوي
ماجد : انت وش اسمك
عزام بعد صمت : عزام
ماجد ابتسم: اسمك مثل اسم اخوي الكبير تمنيت شوفته كثير احسه غير عنهم كان ودي اشوفه بس للحين ما ربي كتب
عزام ابتسم ورجع له : لو بتشوفه بتحبه
ماجد اعتدل : اكيد طول عمري اتمنى ان لي اخوان واحبهم عزام قرب راسه وهو يهمس في اذن ماجد :اجل حبني ي اخوي انا عزام سعود اخوك اللي تمنيت تشوفه
ماجد فز بصدمه :ايييش
عزام رجعه ينسدح : انتبه انت تعبان
ماجد بفرحه : اش قلت انت عزام
عزام ابتسم لفرحته :ايه انا
ماجد انهبل وصار يضحك بفرحه قرب لا شعوريا وضم عزام بادله عزام الحضن وهو يحس فيه قد ايش فرحان وحتى عزام فرح فيه باين انه حبيب وعلى نياته شد ماجد على عزام اللي حسه قطعه منه ارتاح له راحه فضيعه
ابتعدوا عن بعض وماجد مو مصدق :انا عجزت اصدق
عزام ابتسم : صدق صدق
ماجد : كيف كذا كنت تعرف اني ماجد وساكت ..
عزام : يمكن عندي حساسيه من عايلتكم ماحبيت اكشف عن هويتي خصوصا ان الاخبار اللي توصل عنك مش ولا بدنزل راسه ماجد بضيق : ما بيدي شي
عزام : بيدك تغير كل شي انسى كل اللي فات وأبدا من جديد ماجد لا توقف حياتك كذا
ماجد رجع يضمه: اترك كل شي وخلني اضمك ماصدقت متى صار لي اخوان
عزام ضحك على حماسه وروحه الخفيفه اللي زي النسمه فعلا انه كان مظلوم بحياه بائسه
٠٠٠٠
عند تركي وصل لشقة يزن دق الجرس وفتح له كومار : هلا بابا
تركي :اخس كومار وش جابك هنا
كومار : بابا يزن قول تعال هنا نفر مريض
تركي :هههههه وبابا يزن وين
كومار: روح دوام
تركي :زين وين نفر مريض
كومار: نوم جوا
تركي : زين
دخل تركي وراح لغرفة ثامر فتح الباب شافه نايم قرب وهو يشوف اذا تعبان او شي ثامر فز
تركي : بسم الله عليك خرعتك انا اسف كنت بشوف اذا تعبان او شي
ثامر: لا عادي متى وصلت
تركي : تو كيفك اليوم كويس
ثامر : اووه الحمدلله احسن من قبل
تركي :اكلت شي والا تبي اقول لكومار يسوي لك
ثامر: لا لا فطرت
تركي : بالعافيه ما مر عزام
ثامر: لا والله ما مر اليوم
تركي : غريبه
ثامر: اكيد مشغول
تركي : يلا انا رايح انتبه لنفسك واذا احتجت شي اتصل علي
ثامر: ابشر
طلع تركي ورجع ثامر ينام وهو يحس نفسه متكسر
٠٠٠٠
عند نور وصلت هي وابو ماجد نزلوا ودخلوا القصر ونور شايله رعد شافوا ام عزام جالسه وفزت اول ماشافت نور وركضت لها وضمتها وهي تبكي وضمت رعد :وحشتوني
نور: وانتي كمان ي خاله
رعد : تيته ليش رحتي من عندنا
ام عزام عجزت ترد وهي تبكي :كيف عزام وش مسوي ضايق صح
نور ميلت فمها: اكيد ضايق في النهايه روحتكم مو سهله
ام عزام حطت يدها على فمها وهي تبكي طلال نزل :مين نور ورعد ي اهلا وسهلا
ركض رعد لطلال وشاله طلال وهو يبوسه :وحشتني
رعد : وانت كمان وحشتني حيل قد السماء
طلال ابتسم وهو يناظر نور: كيفك ي ملسونه
نور كانت خايفه من عزام وزعلانه من طلال: تمام
ابو ماجد :تعالوا نجلس
جلسوا كلهم ونور قلبها يرقع تدري عزام بيعصب بس وش تسوي
٠٠٠
عند عزام وماجد جلسوا وكل واحد فرحان بالثاني وماجد مو مصدق بيموت : عزام تعال عيش معنا بالبيت
عزام نزل راسه : ما اقدر
ماجد : ليش
عزام : سالفه طويله اقولك هي بعدين بس الحين انت نام وارتاح ولا تجهد نفسك وبطل هالسم وابتدي غذي نفسك كويس وانا بروح اخلص كم شغله
ماجد : ماتطول
عزام: لا تخاف راجع لك
ماجد ابتسم له وقف عزام وهو يساعده ينسدح وطلع وترك ماجد اللي صدره بيتفجر من الفرحه
عزام طلع واتجه لشركه الجد دخل والكل في الاونه الاخيره صاروا يعرفونه ولا احد يقدر يمنعه او يتكلم معه دخل المكتب وكان في اجتماع توجه وجلس على طرف وهو يراقب جابر اللي ارتبك و انهاء الاجتماع طلعوا الناس وتقدم جابر : وش اوامرك الجديده
عزام ابتسم: ايوه خلك كذا لا تلف ولا تدور وفاهمين بعض جيب ورقه وقلم وتعال لأنها كثير
جابر :وبعدين يعني ناوي تخليني على الحديده
عزام قرب وهو يناظره: فلوس الحرام ما تدوم
جابر ارتبك وجلس :وش تبي
عزام اخذ الورقه والقلم وقال : ابي اصفي حق امي واخواني وكل واحد ظلمته وعكرت صفو حياته
جابر : انا ماظلمت احد
عزام : انا ما اطلب تبريرك ناد محاميك خليه يجي
جابر :كل شي بينا محد له شغل
عزام : زين اجل اكتب عندك عماره وارض ومية ألف ريال تكتبها بأسم امي فاطمه الجاسر
جابر : تخسي
عزام :تخسي انت شوف مالي صبر انا ادور الزله تدوير
جابر: اكتب لكل الناس الا امك
عزام ضحك : بتكتب بدون نقاش
جابر وقف بصراخ : مو انت اللي بتأمرني
عزام : اجلس اجلس شفناك فوق وشفناك تحت واكتب عندك
جابر جلس وهو ضايق نفسه وابتداء عزام يملي عليه التنازلات وجابر ضايق خلص عزام بعد ما صفى نص املاك جابر تنازلات ليزن وتركي وامه وحور وطلال وهو ما اخذ ولا ريال وهذا خلا جابر يستغرب :وانت
عزام : انا اموت ولا اخذ منك ولا ريال
جابر : مقابل هالتنازلات ابي منك كل المستندات
عزام وقف وهو يقول : افكر
جابر :وش تفكر انا اعطيتك كل شي نص املاكي بيدك
عزام : اذا امنت شرك عطيتك
طلع عزام بعد ماخذ كل التنازلات وهو بهالطريقه كسر ظهر جابر ولا صفى عنده الا املاك قليله اخذ جابر الجوال وهو يدق على فتحي : خلصني منه بأسرع وقت
فتحي : اليوم كل شي ينتهي
٠٠٠٠
عند تركي كان يدور لعزام في المستشفى ولا حصله دق عليه
عزام: هلا تركي
تركي : انت وينك
عزام : رايح لثامر وانت
تركي :من ساعه ادورك بالمستشفى
عزام: اسمع اترك كل شي وتعال شقة ثامر يلا
تركي : وش صاير
عزام: تعرف هناك خلص
سكر منه ودق على يزن
يزن: هلا عزام
عزام: هلابك انت وين
يزن: بالدوام
عزام: اسمع اطلع وتعال لشقه سريع
يزن: ليش ثامر فيه شي ..
عزام : لا لا بس تعال في موضوع ابي اكلمكم فيه
يزن : يلا مسافة الطريق
وصل عزام ونزل دق باب الشقه وفتح كومار سلم عليه ودخل لثامر اللي كان توه صاحي :اوووه اووه لا تمام اليوم غزال والشر زال
ثامر ابتسم : بفضلكم والله
عزام: ي شينك اذا حسيت بتأنيب الضمير
قرب وهو يسلم عليه ثامر: والله صادق انحرجت منهم سوو معي كثير
عزام ابتسم : تركي ويزن رجال ما عليهم كلام ولا يسمعونك تقول كذا بيزعلون المهم كيف صرت اليوم
ثامر: احسن بكثير الحمدلله
عزام: اكلت
ثامر: ايه الحمدلله
عزام : حمدلله
٠٠٠
عند نور توترت وهي تستنى عزام يدق ماتبي تدق عليه
حور: نور وش فيك
نور : ولا شي احاتي عزام
حور: وش فيه عزام
نور: اخاف يعصب ويزعل عشان جينا هنا
حور: هو بيعصب ويزعل بس ان شاء الله تاليها خير
نور : اوووف قلبي يوجعني مدري ليش
حور: سمي بالله ي بنت ان شاء الله ابوي معاه اهدي انتي
نور وقفت وراحت المطبخ تشرب مويه تحس بغصه ما تدري ليش
٠٠٠٠
عند ياسر كان نازل شااف طلال يلعب مع طفل صغير اقبل عليهم : طلال
طلال : هلا ياسر كيفك
ياسر:تمام وانت
طلال : ماشي الحال
ياسر :مين الحلو هذا
رعد : انا رعد
طلال: رعد ولد عزام اخوي
ياسر: عزام اخوك رجع
طلال هز راسه بلا :جاي زياره لنا
ياسر باس رعد اللي كان لذيذ : اهلا وسهلا انا ياسر
رعد :اهلا فيك
شوي جاء سامر : مين هذا
ياسر : هذا رعد ولد عزام
سامر: عزام اخوك
طلال: ايه
سامر قرب وحمل رعد : اهلا ي بطل كيفك انا عمو سامر
رعد :اهلا
جلسوا الشباب يلعبون مع رعد وهم بيموتون عليه وتجمعوا الكل عليه
..
عند ماجد كان جالس بينه وبين نفسه فرحاااان اول مره يفرح بهالطريقه ي كثر ما تمنى يشوف هالعزام اللي اكل الجو ارتاح له حيل حس انه بخير كان نفسه يجلس مع عزام دايم ابتسم وهو يقول : بسوي كل شي اقدر عليه عشان ترجع عند ابوي ي عزام
٠٠٠
عند ثامر وعزام وصلوا تركي ويزن طلعو بسرعه
يزن : وش فيه
تركي : خفت على ثامر صار له شي
عزام : كلنا بخير اجلسو
تركي : ثامر كيفك
ثامر: احسن
يزن: كيف كومار معك
ثامر: كويس ماعليه
عزام وقف وهو يجيب الاوراق :الحين سمعوني
الكل : وشو
عزام : بما انكم كلكم لحقكم الضرر من جابر وحياتكم تأزمت بسببه حبيت انتقم لكم او بمعنى اصح اخذ لكم حقكم
تركي : شلون
عزام : انا اخذت تنازل من جابر على اغلب املاكه وفيها لكم تنازلات
تقدم وهو يعطي ثامر الشيك :هاذي نص مليون لك تعويض عن اللي صارلك منه والتعب اللي تعبته
ثامر : لا ..
عزام :لا تعترض حقك خذه وانت ساكت
ثامر بزعل: عزام انا فعلا مابي فلوس لا تخلي بينا رسميات
عزام : هاذي مو رسميه انت انضريت منه وكانت عيونك بتروح فيها اعتبره حقك وحق بيتك اللي صار دمار
تركي : صادق عزام خذه ولا تعترض
اخذه ثامر بضيق عزام لف على يزن : وانت يا يزن صار لك كثير منه ومرمرك حيل عشان كذا خذ هذا اثنين من المحلات التجاريه وعماره و١٠٠الف
يزن بضيق :مع اني مابي منه شي بس لعانه فيه باخذها واحطها وقف
عزام ابتسم واعطاه الاوراق والتفت لتركي وقال: وانت بعد ماقصرت وقفت وحاربت معنا عشان كذا لك مثل يزن
تركي وهو يضحك : انا عاد ما برفض بأخذها واسوي استديو اغاني عشان ياخذ ذنب
عزام :ههههههه بكيفك المهم انك تاخذها
ثامر : والله ماقصرت ي عزام
عزام : انا ما اجازيكم والله لكن ابي اخذ حقكم
قطع عليه اتصال نور استأذن وطلع لصاله : هلا نور
نور بخوف : وينك عزام
عزام :شفيه صوتك
نور:ولا شي بس عزام لا تروح البيت
عزام : ايش وانتم وين اصلا
نور بخوف : عمي سعود جاء وقال ان امك تعبانه حيل ورحنا لها معاه
عزام: ايش وليش تروحين اصلا ماقلتي لي
نور: عزام هدي والله من خوفي ما ركزت
عزام: زين زين
سكر والتفت شاف الشباب كلهم وراه :وش فيك
عزام طلع وهو معصب :وش ناوي عليه يجنني يجنني
اخذ تاكسي وراح ويزن وتركي وراه بخوف
تركي :شبلاه هذا
يزن : وش دراني انا جن وقعد
٠
٠
وبسرعة البرق وصل عزام للقصر ونزل وهو معصب دخل وشاف الشباب متجمعين على رعد تقدم ودخل وهو متجاهل نداء تركي ويزن اللي وقفوا برا
طلال: وش فيكم
تركي: مدري شصاير جوا
طلال: لا يكون عصب عشان ابوي جاب نور ورعد هنا
يزن ضرب جبينه: انتهينا
تركي : يالله ي عمي
عند عزام اللي دخل بشره وقف لما شاف ابوه واقف وحاط نور وراء ظهره قرب وهو بعيونه تحدي : نور تعالي هنا
ابو ماجد بهدوء : نور مالها شغل
عزام ببتسامة غضب : انا اكلم نور
نور ماقدرت تزيد غضبه طلعت وهي متأكده انه مابيسوي لها شي :عزام انا اسفه
عزام اشر لها: اشششش
التفت لابو ماجد : ابي افهم وش تبي بحياتي
ابو ماجد : اتركونا لحالنا
فضى المكان ولا بقى فيه الا ابو ماجد وعزام ..
عزام: كم مره قلت ابعد عني طلال اخذته وامي وحور وش تبي بعد
ابو ماجد : عزام انا مابي اخذ منك شي
عزام : انت ماخليت لي شي
ابو ماجد : اسمعني وبعدها بكيفك
عزام بصراخ وعيونه حمرا : اسمع ايش انك كنت مسحور سمعتها وانتهيت غيره عندك شي
ابو ماجد : عزام لا تصير قاسي انا فعلا ما كان بيدي شي ما كنت بعقلي انا كيف كنت بتركم
عزام كان يسمع اعذار ابوه وتبريراته وبكاه وقف لما انزعج وصرخ وهو يشق تيشيرته من النص واشر على الحرق :هذا لما سويته كنت بوعيك قول كنت
ابو ماجد ارمش بصدمه : عزام ي ابوي هذا مو انا
عزام بصراخ :انت كنت انت عرفت ليش انا ما سامحتك انت جرحت وثبت جرحك بحرق علمتني كيف احذر من اقرب الناس لي شايف ابوك ما اختلفت عنه ابد
ابوماجد كان مصدوم : عزاام والله مو انا والله
عزام رجع وهو يصرخ: كيف تنكر كيف مو متذكر انا اذكرك تتذكر قبل ١٠ سنين بالضبط بعز البرد جيت لاستراحتك ارجف ادور اللقمه واللحاف لي ولاخواني كنت اقول مهما كان هو ابوي بيساعدني بس للاسف بكل بساطه امرهم صاحبك وخلاهم يحرقوني وانت تناظر مارجف قلبك وماحنيت كنت تناظرني ومع ذلك ساكت وواقف كنت انتظر منك كلمه وحده والله كنت بسامحك بها بس للاسف صنم
ابو ماجد كانه انضرب على وجهه مايذكر هالموقف يذكر صح صراخ ولد وهو ماكان قادر يسوي شي عشانه كان مسحور ومضطر يخضع لهذاك الشخص
مسك عزام وهو يقول : والله ي عزام ماني متذكر اصلا اصلا هاذيك الاستراحه كان مدفون سحري فيها مقدر اطلع منها والا اموت من الالم عشان كذا كنت ضعيف ي عزام ولا كنت ادري انك هذاك الشخص
عزام بهمس : ابعد عني اعذارك هاذي ما تمشي عندي
٠٠٠
عند جابر اتصل على فتحي اللي كانت معه هاله وقاله : غير الخطه عزام عند البيت سوا اي شي تشل حركته فيها وتقهره
فتحي : ابشر
سكر وهو يضحك :نشوف وين بتوصل ي ولد فاطمه
٠٠٠
عند عزام ما قدر يتحرك لما ضمه ابوه وهو يبكي بكى يقطع القلب حاول يبتعد ما قدر كان يترجاه ويفهمه اللي صار
ابتعد عزام وهو يقول : طيب نقول انك كنت مسحور وماتطيقنا ماجد وش ذنبه وش ذنبه تجيبه وتضيعه
ابو ماجد احتار في الاجابه وماعرف يرد عزام : ماعندك عذر لانك عمرك ما بتكون اب
على سكوت عزام سمعوا صوت فرامل سياره وصراخ ضرب قلب عزام وركض برا والكل طلع من القصور وقف عزام بصدمه عند الباب وهو يشوف رعد طايح وغرقان بدمه صرخ صرخه دوت بالمكان كله :رعععععععععععععععععععععد
ركض له وهو يصرخ بأسمه رفعه من الارض وهو يضمه ويصرخ : رعد رعد ي حبيبي رعد ي ابوي قوم رعد رعععععععععععععععععععععععععععععععععععععععد
تركي ركض وهو يحاول ياخذ رعد من عزام اللي كان في قمة انهياااره صرخ وهو يقول :اتصلو على الاسعاف
عزام وجهه مليان دموع ضم رعد وهو يكلمه ببكى: رعد رعععععد تكفى لا تخليني ي ابوي رعد مابقى الا انت رعد رعد ناظرني رعد
ركض يزن وهو يمسك عزام: عزااام اتركه انت تضره ماتفيده
عزام كان يمسح وجه رعد اللي كله دم وهو يبكي حاول تركي انه يسعفه بأي طريقه بس ماقدر
نور اللي طلعت وانصدمت من حال عزام ورعد اللي طايح بين يدينهم بدمه : رععععععععععد لاااااااااا رعد
ركضت وهي تبعدهم وصلت لرعد وهي تبكي : رعد شصار لرعد من سوا فيه كذا مين
ياسر ركض :نور تعالي نور
نور ضربت ياسر وهي تقول : لا يموت رعد لا يموت رعد
عزام ارتخى لرعد وهو يبكي ويرجف : رعد لا تموت رعد خلك معي ي رعد باقي اشياء كثيره بنعيشها باقي مرتب لك حياه حلوه رعد قوم معي ي حبيبي رعد
كان صوت بكى عزام ونور معبي المكان والكل صار يبكي معاهم
قطع البكى وصول الاسعاف اللي شالت رعد وعزام وتركي معه
اما يزن فعلا خاف على عزام ونور يصير لهم شي
٠٠٠٠
في السياره اللي صدمت رعد كانت هاله تصرخ وهي تبكي : ليش ليييييش قتلته حرام عليك
فتحي لف عليها وهو يضربها بيده ورجعها لورى: عشان تعيشين قتلناه
٠
قبل ١٠ دقايق كان فتحي واقف قبال الباب
هاله: وش بنسوي
فتحي : بنكسر ظهر عزام
هاله :كيف و
قطع كلامها فتحي اللي اسرع بالسياره اتجاه رعد اللي كان يركض وراء الكوره اللي اعطاه اياها سامر وبدون رحمه صدم رعد اللي طار وخبط على الارض وركضوا الكل ياصارخون وفتحي راح
٠٠٠٠
في الاسعاف كانت حالة عزام يحن لها الكافر كان ينوح نوح يفجع وتركي والفريق الطبي يحاولون يسعفونه وصلوا في رمشة عين نزلوا رعد وطاروا به للعمليات وعزام يركض لهم مثل. المجنون وهو دموعه ما وقفت ..
اما عند نور اللي كانت بسياره يزن كان ياسر ماسكها وضامها وهي تضرب في ببكى وتترجاه :تكفون لا يموت رعد لا يموت الا رعد ي ياسر لا يموت
ياسر ماقدر يرد كان يبكي معاها الوضع كان يبكي الصخر يزن كان بحاله ثانيه كان بالقوه قادر يسيطر على السياره ويرجف من كثر ما بكى وصلوا وراحوا ركض وهو يبكون
٠٠٠٠
في القصر كان بيت ابو ماجد متفجر بالبكي والصراخ كانت حور تصرخ وهي تلطم نفسها والبنات حواليها يحاولون يهدونها لكن ماقدروا وام عزام شوي وتنجن وابو ماجد وام تركي وام يزن يحاولون يهدونها لكن دون فايده وقف ابو ماجد اللي كان يبكي بنوح كان يمشي وهو يقول :انا السبب انا اللي جبته هنا انا السبب
سامر ركض لعمه :عمي عمي صل على النبي صل على النبي اذكر الله
طاح ابو ماجد وهو ينوح :ااااااااه ااااااه اي ابو انا دمرت حياته كبير ودمرت حياته صغير اي ابوه ي كسر ظهري عليك ي عام
سامر ضم عمه وهو يبكي معه ويحاول يهديه
٠٠٠٠
اما جابر اللي كان يراقب الاوضاع من البلكونه وشاف كل شي لف وهو يضحك بقهقهه :الحين ما بتقوم لك قايمه ويندفن صوتك مع ولدك برافوا عليك ي فتحي برافو جلس وهو يضحك ويتشمت بعزام سحب زيقارته وهو مستانس
٠٠٠٠
عند ثامر اللي انجن ما عرف وش يسوي يدق عليهم ما يردون ولا يدري وش صار معاهم وقف وهو ينادي كومار
كومار: نعم بابا
ثامر : يعرف عنوان بيت كبير بابا يزن
كومار: اايوه معلوم
ثامر :تعال ساعدني البس وبعدين نروح
كومار: طيب
ساعده وراحوا لقصور الجابر وقف كومار ونزل ثامر شاف البيت في حاله يرثى لها سأل الحارس وقاله اللي صار انخبص ثامر واخذ كومار وراح وهو خايف يموت رعد وقتها راح ينتهي عزام
٠٠٠
اما عند عزام اللي كان معهم بالعمليات ماقدر يسوي له شي دموعه مو مخليته يشوف جلسوه على الكرسي والكل متأثر من حالته كان تركي هو اللي ماسك العمليه وقد مايقدر يسوي سوى لكن بدون فايده رمى كل شي بيده اخذ الصعق الكهربائي وهو يحاول يسعفه بس ارتفع صراخ عزام لما ارتفع صوت الجهاز يعلن عن توقف قلب رعد رمى تركي كل شي وركض لعزام وهو يحاول يثبته بس طاح عزام من طوله وهو مغمى عليه واخر صرخته بأسم رعد اللي كان جثه هامده ..
..
صرخ تركي وهو ينادي الممرضين طلعوا عزام يركضون فيه وهم يحاولون يصحونه والكل صار يبكي من اللي شافوه تركي طلع وهو يتمسك بالابواب ويبكي ركض له يزن: تركي تركي شصار تكفى لا تقول مات تكفى
تركي جلس وهو يبكي : ماقدرت اسوي له شي ماقدرت انقذه كان الحادث قوي عليه كان قوي عليه .... انقطع صوته وهو يبكي
طاح يزن جنبه وهو حاط يدينه على راسه ويبكي
نور صرخت : لااااااا ما مااااات تكذبون ما مااات لااااااا مستحيل رعد لا ي ربي لاا ي ربي دخيلك لاا
ياسر ويزن قاموا لنور وهم يحاولون يهدونها بس ماكان فيه فايده طلعوا رعد وهم لافينه بالغطاء وقفت نور اول ماشافت المنظر صرخت وهي تلف وجهها لياسر محد قدر يقوم صح كان صغير بس تأثيره كبير اخذوه ودوه لثلاجه لما يصحى عزام
٠٠٠٠
عزام اللي صحى بعد نص ساعه وهو يدعي ربه انه في حلم سحب السيروم من يده ورماه بعنف وهو يركض كان مكان السيروم ينزف ولا اهتم له كان كل ما مر من جنب احد يصد وهو يبكي الكل كان يعرفه بالمستشفى والكل ضايق وحزين عليه وصل للعمليات فتح الباب وحصلها فاضيه وقف بنص الممر وهو يتكلم وكأنه انجن فعلا: وين ولدي وين رعد وين اخذتوه رعد ما مات رعد باقي حي رعد وينه رعد ويييييينه
تركي ركض له لما قالوا انه صحى وهذا حاله :عزاام عزاام
عزام لف وركض لتركي :تركي وين رعد تكفى ي تركي قول انه بخير تكفى قول اي شي بس لا تقول مات تكفى
نزل عزام يبوس كف تركي وهو يبكي انفجع تركي وسحب يده وهو يضم عزاااام ويبكي معااه :عزام انا اسف ماقدرت انقذه اخذه الموت ي عزاام انا اسف اسف
عزام صرخ وهو ينوح :لااااااااااااااااااا لاا لاااا لا ي رعد لا تصير مثلهم لا تروح وتتركني ي رعد لاااا آآآخ آآخ ي رعد آخ كسرت ظهري ي رعد كيف اعيش بدونك كيف كيف بكون عزام من دونك مالي قوه الا بك ي رعد تكفى ي تركي سوي اي شي تكفى ي تركي ..
تركي ما عرف وش يسوي ماكان له حل الا انه يبكي بعد فتره كلها بكى تركي وقف عزام وهو يسنده: عزام اذكر الله ي عزام الله اللي عطى والله اللي اخذ مافيه شي بيدينا والا ماقصرنا عزام تكفى ي عزام خلك متماسك
عزام بنوح: كيف بعيش الحين مع من اكون من لي بهالحياه بعده من لي ااااااخ ي تركي ااااخ وين اروح بحالي وين
تركي جلس على كرسي وهو يضمه : عزام قول لا اله الا الله اذكر الله قول انا لله وانا اليه راجعون ..

*يـــــــتـ⇊ـــبـــ؏*

➖➖➖➖➖➖➖➖➖