كرونيك ضحك قصيرة منقووووولة
#الخطوبة (الجزء 1) :
كنت قاعدة نايخني الفيد ايا قلت نطيب شوية حليب نتقهوى و كنت مخبية زوج حبات صابلي فالقجر تاع السوتيانات تاعي قلت نجبدهم جا وقتهم ☕🍪 انا هكذاك نستنى فالحليب يفيض و لحقني ميساج فالتلفون قلت و الله ما نقراه باينة بلي موبيليس برك راح تقولي عيد شجرة سعيد 🌲 زاد شوية و لحقني ميساج وحدوخر انا هزيت التلفون و الحليب فاض نيخ سبي اليوم تقتلني يما غير الصباح غسلت الكويزينيار طفيت عليه و مسحتو ليه ليه و رحت نقرى فالميساج نلقاه سامي حبقلبي قالي ريبوندي من الصباح و انا نعيطلك نسيت بلي كنت دايرة الكود في تيليفوني 📱 و اصلا ماعلابليش علاش درتو حبيت نبين روحي خشينة في بالي المهم نحيت الكود و بلعطتو بزوج كلمات ايا قالي نسحقك في موضوع سيريو و مانيش نرقد الليل علاجالو ايا قتلو و الله ما انا لي نبات نبيبيلك بالماسكي 😐فضحت بروحي يا سبي ايا قالي لالا خاطي علابالي بيك بلي نتي من النهار الاول قالي موضوع حساس قتلو يا وحد العوطاي تمعني على مسعودة 😯 قالي نيخ سبي خليني نهدر قتلو اتفضل قالي فرفوشة نتي طفلة روعة و عاقلة و مثقفة و بنت فاميليا بصح ما نقدرش نكون معاك 😢 ايا قتلو خير برك في بالي غاضك الحال هذاك النهار كي شريت الفلاش و مامديتلكش قالي لالا يما حبت تزوجني بوحدة عجبتها و انا ما نحبش نقولها لالا مالا كل واحد في طريقو ايا انا بديت نشوف فالجنون متحزمين و يشطحو قدامي👻 قتلو روح ياسامي ان شاء الله يحكموك لبواسر نهار عرسك و القاطو يخرج مالح و التريسيتي تروح عليكم و عروستك تلقى مسعودتها كحلة قالي شكون مسعودة هذي قتلو قول امين و بلع فمك و كوبيت عليه و رحت نجري بلوكيتو من الفايسبوك و فاصيت تصاويرو و سيبريميت نومروه و دخلت للفايسبوك حطيت ستاتي في قروب البايرات باش يدعو عليه بالشر و وليت غير نلقى اكتب اسم الله في عشر تعليقات نكتبو و رحت نمشي فالكولوار و الخناين دايرة واد ايا شافني بابا قالي وشبيك يا طفلة ماهدرتش معاه و ضربت الباب برجلي و قتلو قود عليا نتا تان 😠 ايا بابا هز بليغة و عطاني بيها جاتني فالترمة خاطرش قلت العيب قدامو نيخ سبي تنفخت البلاصة ولات زرقة ايا غلقت على روحي فالشمبرة ماحبيتش نخرج و تيليشارجيت اغاني حزينة و بتت نبكي و نشخنن و نتفكر فالعوطاي كيفاش خلاني و ماولتيش نمشط شعري و سليبي نبدلو مرة في يومين و وليت نمشي بالحفا ...يتبع
#ندوشة🌝
