هابطة من طيارتها الخاصة و اخيرا جات لدزاير بعد غياب 7 سنين ملي جابت الباك مامستش رجلها ارض بلادها بصح هاد المرة قررت تستقر هنا و ايدا سافرت تسافر مدات قصار و ترجع ماراهيش قادة تزيد تتحمل بعدها على عايلتها
لابسة اسود في اسود ليقارد كور دايرين بيها مخلاوهاش حتى ركبت طونوبيلتها جاغوار الكحلة و قلعت بأقصى سرعة بعد مدة و صلت لدارهم
و لا خلينا نقولو قصرهم قصر مايجيش فالبال فيلا كبيرا في وسط جنان يدير منها اضعاف قاعة رياضة قاعة سينما ليبيسين و خلي و خلي
داخلة مالباب و استنى في ردة فعلهم بما انو حبت ديرهالهم مفاجأة
تاليا : سلاااااااام راني جيت
كريمة لي كانت قاعدة مع محمد : هذا ماشي صوت تاليا و ناضت تجري
محمد : ربي يهديك وشمن تاليا الطفلة مزاللها شهر باش جي
تاليا : ام بصح انا جيت اليوم
دارت ليها كريمة لي كانت عاطية الباب بضهرها و راخت تجري تعنق فيها توحشتها موت كيفاش لالا و هي وحيدتها و كبدتها
ناض محمد هو تاني يجري لبنتو يسلم عليها فإدا كانت كريمة توحشت بنتها مانهدروش على محمد لي كان قريب ليها كتر (ملاحظة هما مالفين يطلعو ليها يعني ماشي 7 سنين ماشافوهاش)
داوها قعدوها فوق الفوتاي و هوما معنقينها ماحبوش يتلقوها كامل
كريمة : ايه يابنتي و علاش ماقلتيليش بلي راكي جاية كنت درتلك جفنة شخشوخة كيما تحبيها
تاليا : ماما حبيت نديرهالك سوربريز ماعجبتكمش
بصح الطبسي تاع الشخسوخة مانسمحش فيه نحب ناكلو فالعشاء من يديك
كريمة : معليش يابنتي لي حبيتيها .
محمد: توحشناك يا بنتي وعلاش طولي علينا الغيبة قاع هكدا
تاليا: معليش بابا خلاص راني قررت نسكن هنا معاكم مانعاودش نطلع لطاليان
كريمة: يعطيك الصحة يا بنتي فرحتيني ربي يفرحك
تاليا: تعيشي ماما
محمد: ايه واش قررتي ديري فالشركة تاعك
كريمة : بوه هداوين جات بديتها بالخدمة خليها تريح اوموان شويو
تاليا : معليش ماما عندو الحق
قررت نروح نشوف كاشما بيرو و نشريه اومام تون نشري تراب و نبدا نبني فالشركة هكدا مانستناهاش حتى تتبنا باش نبدا نخدم
محمد : مليح ما درتي يا بنتي و كاشما خصك راني هنا
تاليا : تعيش بابا ربي يخليك
قعدت قصرت معاهم حتى شبعت اومبعد
تاليا: ايا خلوني نطلع نرقد حنموت بلعيا
كريمة: اطلعي بنتي ريحي كي يطيب لعشا راني نوضك
طلعت البطلة تاعنا ترقد
نخليوها و نجوزو للبطل تاعنا
كان قاعد مع صحابو ف salon de thé لي جوز تحب تهدر معاه بصح هو ماشي مقيم حتى وحدة هديهيا الصفة لي معروف بيها قيصر مايحبش لبنات و مايدورش بيهم جملة كيما يقولو خاوتنا التوانسة
عندو في خياتو ختو ويماه و بس هدا بسباب احدات صراولو فالماضي راح نعرفوهم فالمستقبل انشاء الله
نولو ليه
قاعد حاكم قهوة كحلة في يد و دخانو في اليد التانية صحابو يقصرو و يضحكو و هو يسمعلهم برك هدا طبعو مايحبش الهدرة
فهد: وشبيك ياصاحبي اهدر معانا شوية قيمنا
سامي ( صاحبو وحدوخر ماشي مهم و ماعندوش بلاصة فالحكاية) شفت كيفاش يعامل فينا تقول قاعدينلو فوق قلبو
قيصر: ديماريتو الهدة خلاص مراحش تحبسو
راكم تشوفو فيا كيما نتوما بالع كاسيطا راني نسمع فيكم خلاص
فهد: مالا هكدا الحق فينا لي حابين نقصرو معاك ماتتعاشرش يابن عمي
قيصر: هاي بدات الدصارة لي مانحبهاش ايا انا نخليكم عندي امور
سامي: امور اه قولنا ماللول ماراكش حاب تقعد معانا نفهموك
قيصر : افهمها كيما تحب ايا باي
فهد و سامي : باي يخي مهبول يخي
خرج البطل تاعنا من عندهم و قلع للشركة عندو اجتماع منا علا نص ساعة لازم يوصلو
بعد ربع ساعة كان ديجا لحق لي يشوفو يصوق يقول مهبول و راهو هارب مالسبيطار
طلع للبيرو تبعاتو السكرتيرة تاعو لابسة و لا خلينا نقولو ماشي لابسة خير علاخاطرش كيف كيف
سكرتيرة: موسيو قيصر عنك اجتماع على ربع ساعة مع عملاء الالمان
قيصر: شكون قالك ادخلي ماتعرفيش عفسة و سمها باب ولا مارباوكش مليح اخر مرة المرة الجاية تروحي لداركم
السكرتيرة : سمحلي موسيو قيصر اخر مرة
قيصر: و المرة الجاية اعرفي واش تلبسي راكي جاية لشركة محترمة مادابيك
السكرتيرة : حاضر
قيصر: اخرجي دوك كي يجو العملاء جوزيهم لقاعة الاجتماعات
هبطت راسها و خرجت و هي قريب تتلقها تحتها دخلت تخدم جديدة او وصاوها مادورش بيه بصح هي حبت تسيي زهرها و ندمت حلفت اخر مرة دور بيه
اما من جيهت قيصر
قعد على البيرو سارح لبعيد يخمم فحياتو فمشاريعو
مافيقو من سرحتو غير السكريتار لي قاتلو بلي الوفد وصل رفد روحو وراح لقاعة الاجتماعات
بعد مدة
رئيس الوفد : بصح موسيو انتا راك طالب ب 65% مالارباح هدا الشي كبير بزاف واش رايك ف %50 50%
قيصر: راك سامع واش راك تهدر انا لي نقرر هنا قلت 65% عجبك عجبك ماعجبكش الباب يفوت جمل
رئيس الوفد: لالا خلاص كيما تحب 65% ليك و 35% ليا
وقف خمس معاه و خرج هادا روتينو كيما كل مرة هو لي يحط القواعد و القوانين و كلش يمشي كيما يحب هو
عند تاليا:
ناضت مالرقاد ميتة بالفرحة و اخيرا ولات لدارهم لفراشها و لمخدتها و اهم شئ عايلتها
هبطت لتحت لقات يماها تحط فالشخشوخة
تاليا : نشوف فيك دخلتي للكوزينة ليوم
كريمة: شفتي كي حبيت نطيبلك من يديا تقوليلي هكدا
تاليا: خلاص ماتزعفيش ماما و راحت عنقتها
كريمة : وعلاش انا نقرد نزعف منك
دخل عليهم محمد
راني نشوف فيهم مقصرين وعلاش ماعيطتوليش
بابا جيت ارواح نتعشاو
قعدو قاع يتعشاو
تاليا: ام ماما الشخشوخة جات تهبل
كريمة: بصحتك بنتي
____________________________________
خلاص البارتي تاع اايوم نشاء الله تكون عجبتك
علابالي قصير بصح الاحدات راهم جايين
