👑هوس_مللك👑

الحلقة الاولى

ناضت صباح علا صوت العصافير و الشمس لي دخلت من طاقة تع بيتها وقفت تتكسل وراحت قدام الطاقة تشم في هواء نقي تع الصباح درات خارجة من شمبرتها راحت لدوش دارت دوش و خرجت لبست جبتها ضفرت شعرها ودارت هاديك المحرمة فوق راسها (افوس افوس كيما يقولو لقبايل😂) ودخلت للكوزينة تغني و تشطح حلت الفرجيدار جبدت الشكارة تع الحليب و دراتو يفيض و راحت توجد الطاولة حتى تفيق جداتها
من جاهة اخرى
فاق كيما العادة علا الخمسة هدا هو توقيتو ديما كل صباح ناض لبس سيرفاتو ودخل لبيت جابة داخل بيتو صال دو سبور دخل و خرج بعد ساعتين دار دوش خرج لبس كوستيم رمادي دار الساعة و الريحة و سقم شعرو للور و خرج لتحت لقاهم يسناو فيه ... العائلة: صباح الخير .... حرك راسو و قعد يشرب في قهوتو المرة بلا ولا كلمة هكا طبيعتو ميحبش يحكي بزااف سيرتو في الصباح كسرت الصمت صوفيا جداتو علا نفس الموضوع....صوفيا:كارلوس وليدي وقتاش نفرحو بيك راك كبرتي يا وليدي خمم وقلي رح نجيبلك لالات النساء ... مسح فمو وناض كارلوس:بصحتكم 😐 ... شافت فيه بحزن ديما مين تجبدلو علا الزواج يتجاهلها و يروح وقفت ميليا وحكات:خليه علا حالو يا لالة صوفيا متلزيش عليه هو كبير و يعرف صلاحو وكان كانت وحدة في حياتو رح يتزوجها ولدي و نعرفو... خرت فيها صوفيا من فوق للتحت صوفيا:ولدك!! علاه متروحيش تقنعيه بزواج خلي يجيبلنا ولي العهد تراباتو ولادهم رح يزوجوهم ... ميليا:قتلك بلي وليدي و نعرفو الحاجة لي فراسو يديرها وكون جا يخمم في الزواج راهو زوج ومسنا حتى واحد يأمرو ... صوفيا:رح نزوجو برضايتو ولا بلا رضايتو ... ميليا : ورح تشوفي .. روبيرتو:يما واش رايك نزوجوه بكارلا ... شافت فيه ميليا بشنوفة جات تحكي قصتها مرت روبيرتو انا: واش ميليا واش خصها بنتي لالات النساء .. ميليا:علاه انا واش قلت ... انا:كنتي رح تقولي بنتي زين و طاي وشكةن كيفها تحكي و تمسح علا راس كارلا لي تتبسم بشر روبيرتو:ايه بنتي زينة البنات وكي يتزوجو منها نتهنا علا بنتي منها نضمنو الورث مش تجي بنت اخرى من عائلة اخرى تولي تسال فينا ... شافت فيه صوفيا و ثالت: عندك الحق روبيرتو رح نشوف كيفاش نقنعو يديها ... فرحت كارلا كون تصيب تنوض دير عرس بصح لالا مش قدامهم لازم تكمل في دور الفتاة العاقلة الرزينة ... ناضو من الطاولة و تفرق كل واحد لشغالاتو
عند كارلوس لي خرج من القصر رايح للشركة عيط لالبيرتو ... كارلوس: الو ... البرتو : وشش شريكي اك مليح غبرتي علينا هاد الايام ... كارلوس:عديلي للشركة نسحقك... البرتو : هدا مكان صحا دوك نجي ... كوبا عليه كارلوس و ركب في الطكسي رايح للشركة
عند اياز لي كملت تحضير لفطور وراحت تنوض جداتها دخلت لغرفتها بلا احم ولا دستور اياز:فطوووووم يلا نوضي بزااف عليك هاد النوم.... شافت لفراشها ملقتهاش دورت وجها للكرسي لقاتها شادة السبحة تسبح... فاطمة: سمالله عليك يا طفلة واش بيك تعيطي علا الصباح ضحكت اياز:راني وجدتلك لفطور يا فطوم حطيتك مزال راقدة جيت نوضك وجدت لفطور هيا نفطرو ناضت فطوم بعكازتها تمشي بسيف راحت تجري اياز تعاون فيها حتى وصلو للكوزينة قعدتها في الطاولة و راحت تصبلها في الحليب وهما يضحكو و يقسرو مع بعض كملو لفطور و لمت الكوزينة اياز:ماما فاطمة راني خارجة نجيب لخضرة للغداء... خرجت تجري لبرا تدور وتشم في الهواء في قريتها لي تعدي تسلم عليه راحت للخضار تشري في الخضرة جات تجبد الصوارد لقاتهم قلال بقات تشوف فيهم مجاوش حتى نصف سومة الخضرة بقات تشوف في السوارد و الخضراء من بعد شافت في البائع جات تحكي قالها: معليش بنتي اديهم سماح...اياز: بصح عمي هدا حقك وانت تانيت تخدم علا عائلتك.. الراجل:  معليش بنتي هاد اليوم ادي وكي يكون عندك سلكيني... اياز: الله يحفظك عمي تبسملها السيد و راحت اياز تمشي وتخمم حابة تخدم باش تعيش جدتها هاد المبلغ لقليل لي تديه كل شهر ميكفيهاش تفكرت سامية جارتهم تخدم في قصر رح تحاولها انها دخلها معاها روحت للدار حطت القضيان و خرجت تجري عند سامية وصلت دقت الباب مرة و زوج و ثلاثة حتى خرجلها الجار و قلها بلي مكاشها عرفتها تخدم قالت نولي في الليل رجعت لدار تكركر في رجليها دخلت راحت توجد في الغداء و جداتها قدامها تشوف فيها علا غير عادتها موالفة ديما تضحك و تحكي متسكتش ... فاطمة: اياز .. مسمعتهاش اياز ... فاطمة: اياز يا اياز وين روحتي...اياز:اه اا ماما فاطمة عيطيلي؟!... فاطمة:يا بنتي قرجومتي خرجت وانا نعيط بححت في واش راكي تخمي علاه وجهك مقلوب هكا صراتلك حاجة... هبطت اياز راسها مش موالفة تكدب ولا تخبي علا جداتها حاجة ... اياز:يما انا بسراحة 😰 .. فاطمة:واش بيك يا بنتي احكيلي حببتي بلاك نلقاولها حل .... اياز:يما من موقبيل كي رحت شريت الخضرة كانو السوارد ناقصين كنت رح نقص من الخضرة و ندي علا قد سواردي بصح سواردي بزااف قلال ميجيبو والو ولا حشم مني البائع وقالي اديهم ونهار اخر كي يكون عندك السوارد سلكي ... فاطمة: ايه يابنتي ربي يحفظو و يخليه ان شاء الله ... اياز:لالا يما هدا مشو الموضوع حبيت نقلك بلي سواردنا معادوش يكفيونا عدنا منلقاو مناكلو و زيد مصروف دواك و الطبيب و الكراء و المعيشة غلات يا الغالية عىا هدا انا قررت نخدم...  فاطمة:علاه يا بنتي تخدمي علا صغرك ميكفيكش انك هازتني و هازة الدار قصتها اياز:لالا يما نهزك بلا مزيتي قد مدرتلك مش رح نردلك خيرك يا لعزيزة لميتيني من الشارع و دخلتيني دارك و انا لازم نردلك خيرك و انا حابة نخدم متخميش بزااف .. فاطمة : الله يرضى عليك يا بنتي ..تبسمتلها اياز فرحانة لانها منقشتهاش بزااف في موضوع الخدمة و مشها معارضة علا خاطر تع الصح حالتهم تلز عليها انها تخدم