الآزل '13'

البارت الاول

السلام عليكم أحبتي في الله..
اتمنى انكم حظيتم بيوم جميل..
قراءة ممتعة..

«الازل "13"»
...................................................

كاعده بالهول العب بلعابتي كلش حلوة صغيره
متونسة عليها.. عفتها شوية واني اشتم ريحة خبز حار يخبل.. ابتسمت ورجعت العب بلعابتي
سمعت تلفون بيبيتي يدك من غرفتها

" يا باب الحوائج حاجتي يمك"
" يا باب الحوائج حاجتي يمك"
"عليك اقسم بضلع الطاهرة امك"
"عليك اقسم بضلع الطاهرة امك"
"عطر.. عطر گبرك اشمه"
"دليلي ويجلي همه"

هاي جانت نغمه رنينها.. ركضت لغرفتها واخذت تلفونها.. جان جوة مخدتها هي عندها عادة تحط جوة مخدتها البطانيه الجوزيه حتى يصير راسها عالي.. اخذت تلفونها الصغير الازرك وطلعتلها اركض شفتها بالوراني كافة ردانات دشداشتها السودة ولافة الشيلة على راسها وتخبز.. ملابسها كلها طحين وتراب..
.. بيبيي بيبيي
ابتسمت.. ومسحت عرق جبينها..
.. ها ولج ترديلج خبزة حارة تعلسيها.. صبري هسه يصير الغده..
.. لا بيبي تلفوج يدك..
عافت البيدها وراحت تغسل ايديها.. الي خلاها الزمن مُجعدة..
اجتني وهي تنشف بخاوليها البرتقالي..
.. شو بالله..
ضيقت عيونها وهي تدور على دكمة الرد.. والتلفون لحد هسه ما سكت..
رفعته وسمعت السلام.. ابتسمت
وعليكم السلام.. هلا عيني هلا خيتي شلونج؟  شلون صحتج؟ اخبارج امورج؟.... ولله الحمدلله عايشين.. الويلاد شلونهم بنياتنا؟
.....
ايي شوكت متجون اهلاً وسهلاً ومرحباً
البيت بيتكم.. هاا.. ان شاء الله ان شاء الله
يلا عيني سلمينا على.. وعلى... وعلى..
مع السلامة حبيبتي مع السلامة عيوني..
سدت التلفون واني اباوعلها بدهشة
طفلة عمري ٥ سنوات تمنيت عندي لباقتها بالكلام اتمنيت مثلها بشوشة اجامل واكون صاحبة ملگه..
باوعتلي وابتسمت.. تدرين اليوم منو يجي؟
هزيت راسي بـ لا.. منو؟
.. خالاتج الي همه خواتي.. وابتسمت
باوعتلها بفرح.. صدك بيبي؟
.. اي ولله يا حبيبتي ولج لا تاخذنا السوالف خل اوصيهم يجيبون سمج حتى اسويه
.. واني بيبي؟
باوعتلي.. انتي مرة معدلة ام بيت روحي عدلي الاستقبال.. تعلمي بيبي دائماً خلي بيتج نظيف حتى الي يجيج تنفتح نفسه من نظافة البيت دائماً خليه يتهوه وخلي معطر..
هزيت راسي بـ اي واني فرحانة.. بيبي كالت اني مرة مستحيل اخيب ظنها.. ركضت اعدل الاستقبال مثل ما كالتلي.. هو نظيف بس هي تحب تخليني اعتمد على نفسي..
ساعة بالزايد وطب ابوية شايل السمج تلكيته ابتسملي وبوسني.. راح لبيبي سلم عليها وانطاها السمج وصعد حتى ينام لان تعبان..
رجعت للهول العب بلعابتي العفتها وسمعت صوت بيبي تصيحني
.. ولججج تعاااي
ركضتلها شفتها كاعدة ع تختة الخشت بالوراني وبيدها سجينة وجيس السمج..
.. ها بيبي؟
.. تعاي يبعد بيبي كعدي يمي تعلمي حتى من يصير عمرج ١٣ اخليج انتي تسويلياها
طرت من الفرحة وركضت كعدت يمها..
شفتها شلون تكشر السمجة وتسمي عليها
.. بيبي..
.. اللهم صلِ على محمد وآل محمد.. ها حبيبتي..
.. ليش اختاريتيني اني اداريج؟
ابتسمت وكالت بشقة.. ليش ولج متردين تداريني؟
فتحت عيوني مبررة.. لا بيبي ولله مو هيج بس...
ضحكت.. لا يعيوني اشاقة وياج.. تنهدت.. لان انتي احسن منهم.. اني متأكدة تربيتي راح تغزر بيج ومتأكدة راح تداريني.. انتي حبيبة بيبي والعزيزة..وانتي حبابة وسباعية
باوعتلي وابتسمت
.. ادري مدتفهميني بعدج صغيرة بس من تكبرين راح تفتهمين واذا اني يمج بوسيني واذا جوة التراب كولي الف رحمة ونور عليج يا بيبي
اني كبل دمعت وحضنتها
.. لا بيبي لتحجين هيج.. ان شاء الله يصير عمرج طويييييل
ضحكت وحجت مغيرة للموضوع.. ولج رجلية تكسرن من هاي الكعدة كومي ننظف السمجة
.. مسحت عيوني  كتلها.. لا تخافين اني راح اصير طبيبة واعالجج
لمعت عيونها وابتسمت.. كمنا اني وياها نظفنا السمجة وهي تعلمني الى ان سمعنا صوت الباب
طبوا خواتها وسلمت عليهم.. رغم صغر سني الا بيبي علمتني اطب اقدم من الجبير للصغير وانصي الصينيه قبل ما انصي روحي
مشيت نفس تعليماتها وسمعت احسن مدح
حسيت روحي ملكت الدنيا...
شفت بيبي مدت ذيج السفرة الخرافية.. شتريد تلكة..تمن.. سمج.. زلاطة.. مقبلات.. لبن.. لبن شرب.. شوربة.. والخ...
غير الفواكهه
باوعت لبيبي تضحك وياهم.. الله يحفظها الي..
المهم كعدوا بالساعتين وطلعوا.. لليل شفت بيبي تباوع ع تلفزون ومدمعة
كعدت يمها ومسحت على جتفها..
كتلها.. بيبي ليش عيونج مدمعة؟
باوعتلي ومسحت عيونها بطرف الشيلة..
ابتسمت.. لا بيبي نعسانة اني.. انتي شوكت تروحين للمدرسة؟
بفرح.. بابا كال مو باجر يعني ورا باجر..
ابتسمت.. اسمها عگب باجر..
.. هيجي اسمه؟
.. اي حبيبتي.. المهم.. باجر اريدج تجيني العصر حتى نروح اني وياج نشتريلج جنطة وقرطاسية من صاحبتي..
باوعتلها بعيون تلمع.. صدك بيبي؟
.. يي ولله بس مو تتاخرين
.. لالا ما اتأخر وهسه تشوفين
ضحكت.. خوش
طلعت جبس ليز ابو الالف وقوطيه سفن
.. روحي جيبيلج كلاص حتى اصبلج وياي
..صار
ركضت جبت كلاص وكعدت يمها..
صبتلي ورادت تفتح الجبس مكدرت
باوعتلي وضحكت.. فتحي الجبس هاج مابيه حيل
اخذته منها وفتحته.. كعدنا ناكل ولمن خلصت كتلها.. بيبي بيش الساعة؟
.. بألف ونص
ضحكت.. لابيبي عده الشقة شكد؟
.. وج بيبي شمعلمني مااشوف
كمت ونفضت ثوبي من الجبس اخذت الكاغد ذبيته والكلاص ع سنك.. غسلت ورحت بوستها
.. بيبي راح انام حتى باجر نروح لصاحبتج
.. ايي حبيبتي اتفقنا بس اذا تأخرتي اعوفج واروح هااا
.. لالا كتلج ما اتأخر
.. خوش يلا تصبحين على خير يعيوني
.. اجمعين بيبي الحلوة
صعدت نمت ببيتنا..
"اليوم الثاني"
كعدت واني كوة افتح عيوني باوعت محد يمي
لا يالله بس لا تأخرت وبيبي عافتني!!
ركضت للحمام وغسلت وجهي وركضت جوة
نزلت لكيت بيبي وامي كاعدات بالهول يسولفن تنهدت براحة وتقربت كعدت بحضن بيبي
.. يمة هلا..هلا بالي اجة والبيت والحوش انلمة من كثر ما گلنه هلا..
ابتسمت بنعاس..
امي ضحكت وكالت.. ولج غير تكولين لبيبي صباح الخير..
.. جوعانة
.. شوف اكلها كولي صباح الخير تكول جوعانة
كرصت رجلي بشقة
ولاني الله يسلمني الحبيبة مال بيبي ضميت روحي لحضن بيبي اكثر وسويت روحي ضايجة
بيبي ضحكت وكالت لامي..كومي سوي لبنيتي ريوگ حتى اخذها لصاحبتي نشتريلها غراض بنيتي كبرت وصارت مرة راح تروح للمدرسة..
.. ياا تاخذين بس بنيتج لحد واني؟  اني هم اريد اروح..
.. لا ما تجين اني اخذ بس بنيتي..
ابتسمت امي وكامت تسويلي ريوك خلصته وسبحتني امي ولبستني ملابس مرتبة..
نزلت لبيبي لكيتها كاعدة تمشط شعرها الولادي صفح.. رشت عطر ولبست جواريبها وعبايتها..
.. يلا حبيبتي لنتأخر كون قبل الصلاة احنه هناا
.. اي بيبي..
لزمت ايدي شعور يجنن دفئ مو طبيعي..
فتحت الباب وطلعنا...

يتبع...