ندى:ماما مشفتيش وين حطيت نواضري؟
نورة:لالا مشفتش ضلي تحطي فيهم وين جات امبعد صباح تبقاي تحوسي عليهم وكي توصلي روطار للجامعة وتراطي les TD جي تشكيلنا هنا وتقولي لازم ديرولي طونوبيل
هاذي هي ماما نغلط نسقسيها على كاش حاجة وين راهي ديرلي درس طويل عريض حتى نندم ندامة كحلة لي سقسيتها
شفت ف ساعة لقيتها سبعة ونص احوجي اني روطار بزاااف وليوم عندي TD ملازمش نراطيه سمحت في نواضري لي بلا بيهم نولي عمية مانشوف والو وخرجت من كي المهبولة باش نلحق الكوس حبطت للحومة صبت حبيبتي وجارتي زينب تستنا فيا ووجها مقلوب
زينب:ندى يالبقرة علاش طولتي كون زدتي شوي والله ماتصيبيني
انا:كلبة متحشميش تسمحي فيا
زينب:لوكان ميخلونيش ندخل تاع صح نتعرالك ونولي منحشمش
انا:ههههه يالمهبولة وحدك نتي
رحنا نجرو انا وزينب باش نركبو الكوس كنت طالعة حتان جبدتني من روبتي
انا:وااشبيك اطلعي ضك يروح
زينب:وين راهم نواضرك يالعورة مراكيش تقراي لبلاكة وين يدي اه ياربي لوكان غير خليتك ركبتي هذا يهملك كاش بلاصة ونتهنا منك
انا:يالطيييييف لي يسمعك تقول هاذي عدوتها ماشي صحبتها
زينب:البسي نواضرك البسي نخاف تزدميلي في كاش بوطو نباصي بيك
انا:ماجبته
مكملتش كلمة زينب بدات تعرش
زينب:نندب حناكي باش تبليت مع صبااح علاش ماجبتيهمش ليوم نباصي معااك
انا:واش فيها ياك انا صحبتك الجميلة
تبسمت زينب وقاتلي
زينب:اركبي ياصحبتي العورة ماشي الجميلة
وصلنا للجامعة اخيرا حسيت روحي راح نتغاشا لداخل الكوس تالمو كان معمر
لحقنا كي العادة روطار لبروف مخلاناش ندخلو حتى شبعناه تحلال
البروف:راح نخليكم تدخلو في خاطر عينين ندى زروقة لي لونهم كي لون البحر
تبسم معايا دخلت وخليتو واقف وانا غلبني ضحك
زينب:هههههههه مكانش علابالي بلي البروف تاعنا حلاب اه ياندى راهضارب عشقة في عينيك
انا:خليني خليني وش فايدة تاعهم كي عميين
زينب:بين العين حبيبتي تالمو عينيك شابيين ومكاش لي يشوفهم ومايعشقش فيهم علابيها نقسو من شوفة
انا:راكي تصبري فيا ولا كيفاش
البروف:ندى وصحبتها تسكو ولا نبدل رايي وتخرجو
كملنا TD خرجت من الجامعة مدڤدڤة وميتة من الجوع
انا:زينب وش ناكلو اليوم
زينب:انا مناكلش راني اون غيجيم
انا:ففففف غيجيم ولا تمشحيح
زينب:هههههه لازم حبوبتي باش ندير كادو لحب قلبي
انا:يخي جياحة ابقاي تقتلي روحك بلجوع وديريلو لي كادو مع لخر لن يطزوجكي وانت تولي كيما مجاعة تاع اثيوبيا
زينب:فففففف وجه الشر
انا:معليش لفطور عليا ليوم وش تاكلي
زينب:قووولي والله تشوفي ندى شفت واحد يبيع شاورما بزااااف بنينة داني ليه حبوبي ويبيع واحد بانيني وااش نقولك
انا:ااااي بعقل ختيتي ماشي كنتي اون غيجيم بلا جدك غير نخلصلك طبسي تاع شلاضة ورق
فطرنا انا وزينب فالطريق عيطتلي ماما
انا:وي ماماتي
ماما:ندى صبت نواظرك مكسرين ومرميين تحت الخزانة
انا:كفاااش شكون كسرهوووملي
ماما:وانا وين علابالي مهم نبعثلك عنوان تاع واحد طبيب تاع عينين مليح روحي ليه لازم تشوفي حل لعينيك خير من هاذو نواضر كل مرة يتكسرو
انا:اوكي ابعثي وقولي لكنزو كي نجي نوريلو
بعثتلي ماما عنوان طبيب
انا:زينوبتي جي معايا
زينب:اااااا ندى درت غونديفو مع سليم منقدرش نجي معاك بب
انا:سما هذا بوكرش خير مني هياااا ياك انا خلصتلك فطور بليييز
زينب:ندى والله راني متوحشاتو بزااف سمحيلي
انا:مانسمحش وطيري عليا وتاكلي الرهج وانشالله تحكمك لادياري وانت معاه
زينب:هههههههه يعطيك غمة يالمهبولة باي باي
وصلت لطبيب وبقيت نستنا تلحق دالتي ومن بعد طول انتظار اخيرا سمعت اسمي طبطت ودخلت وكي غلقت الباب طاحت عيني على هذاك الراجل لي كان قاعد ويشوف فيا كل دقيقة ختها حسيت دنيا دارت بيا حسيت برجليا مهومش قادرين يزيدو يوقفو شديت ف باص تاع باب خفت نطيح اما اليد لخرا هزيتها شريتلو بصباعي وقتلو
عمااد!!!
يتبع...
*********************************
سلام لبنات انا جديدة معاكم هنا نشالله تشجعوني نكمل نكتب واني نعيا باش نكتب
نكمل ولا لالا؟
